اسلام آباد (آن لائن) سابق وزیراعظم نواز شریف کا راولپنڈی سے لاہور براستہ جی ٹی روڈ استقبال شاندار بنانے کیلئے مسلم لیگی ورکرز پر قومی خزانہ کے منہ کھول دیئے گئے ہیں۔ ترقیاتی فنڈز کے نام پر راولپنڈی‘ گوجرانوالہ اور لاہور ڈویژن کے اراکین قومی اسمبلی اوربلدیاتی اداروں کے نمائندوں کو کروڑوں روپے کے فنڈز فراہم کئے جائیں گے۔ یہ فیصلہ پنجاب ہاؤس اسلام آباد میں کرپشن اور منی لانڈرنگ پر نااہل ہونے والے ویراعظم نواز شریف کی صدارت میں ہونے والے ایک اعلیٰ سطحی اجلاس میں کیا گیا ہے۔

نواز شریف نے وفاقی اور صوبائی حکومت کو فیصلہ بارے زبانی پیغام ارسال کرتے ہوئے ہدایت کی ہے کہ جی ٹی روڈ کے ارد گرد اضلاع کے اراکین قومی اسمبلی اور بلدیاتی نمائندوں کے رکے ہوئے ترقیاتی فنڈز فوری طور پر ریلیز کئے جائیں۔ ان نمائندوں کو ہدایت کی گئی ہے کہ استقبال کو شاندار بنانے کیلئے دولت کو راستے کا پتھر نہ بننے دیا جائے مسلم لیگی ورکرز جتنا دل کھول کر خرچ کریں گے اس سے دگنا انہیں ترقیاتی فنڈز کی صورت میں مل جائے گا۔ حکومتی ذرائع نے بتایا ہے کہ وزیر خزانہ نے فنڈز کی فراہمی کو یقینی بنانے کیلئے فنڈز کی جلد ریلیز بارے متعلقہ حکام کو ہدایات بھی جاری کردی ہیں۔ توقع کی جارہی ہے کہ روپے جلد جاری ہوں گے جو ترقیاتی فنڈز کے نام پر مسلم لیگی ورکرز کو ملیں گے۔ مسلم لیگی رہنماؤں کو ہدایت کی ہے کہ یونین کونسل کا چیئرمین 100 گاڑیاں جبکہ یونین کونسل کا ممبر کم از کم دس گاڑیاں ساتھ لائے ایم این ایز کو کم از کم 5000 آدمی سڑکوں پر لانے کی ہدایت کی ہے جبکہ ایم پی اے کو بھی 10000 ورکرز سڑکوں پر لانے کی ہدایت کی گئی ہے اس مہم کے تمام اخراجات قومی خزانہ سے ادا ہوں گے یہ قومی دولت کا ضیاع صرف نواز شریف کے استقبال کو شاندار بنانے کیلئے کیا گیا ہے۔