کراچی (این این آئی) حروں کے روحانی پیشوا اور مسلم لیگ فنکشنل کے سربراہ پیر صبغت اللہ شاہ راشدی پیر پگار ا سے جو ان دنوں متحدہ عرب امارات کے دورے پر ہیں دبئی میں سابق صدر جنرل ریٹائرڈ پرویز مشرف اور پیپلز پارٹی کے سابق ایم این اے سردار نبیل گبول نے الگ الگ ملاقات کی ہے۔جبکہ سابق گورنر سندھ ڈاکٹرعشرت العباد کی بھی جلد پیرپگارا سے ملاقات کا امکان ہے ۔
مسلم لیگ فنکشنل کے ذرائع سے معلوم ہوا ہے کہ پیر پگارا اور سابق صدر پرویز مشرف کے درمیان دوگھنٹے سے زائد دیر تک جاری رہنے والی ملاقات میں ملک کی تازہ ترین سیاسی صورتحال اور سپریم کورٹ کی جانب سے میاں محمد نواز شریف کی نااہلی کے فیصلے کے بعد پیدا ہونے والی تازہ ترین سیاسی صورتحال، مسلم لیگ فنکشنل اور پرویز مشرف کی آل پاکستان مسلم لیگ کے درمیان دوطرفہ سیاسی تعاون کے امکانات اور مختلف مسلم لیگی دھڑوں کو پھر سے متحد کرنے کے علاوہ دوسرے کئی اہم سیاسی موضوعات پر تفصیلی تبادلہ خیال کیا گیا۔ذرائع نے بتایاکہ سابق صدر پرویز مشرف اور پیر پگارا کے درمیان اس سے قبل بھی پاکستان اور دبئی میں کئی ملاقاتیں ہوچکی ہیں اور دونوں رہنماؤں کے درمیان دیرینہ اور خوشگوار سیاسی مراسم ہیں۔ اسی دوران پیر صاحب پگارا سے دبئی میں موجود پیپلز پارٹی کے سابق رکن قومی اسمبلی سردار نبیل احمد گبول نے بھی ملاقات کی ہے جس میں سیاسی صورتحال اور مستقبل کے ممکنہ سیاسی منظر نامے کے حوالے سے تبادلہ خیال کیا گیا۔ یاد رہے کہ نبیل گبول کچھ عرصہ قبل ایم کیوا یم سے کنارہ کشی اختیار کرلینے کے بعد دوبارہ پیپلز پارٹی میں شامل ہوئے تھے۔ پی پی میں شمولیت سے قبل انہوں نے پاکستان تحریک انصاف میں شمولیت کی بھی کوشش کی تھی اور وہ عمران خان کی جانب سے اسلام آباد کے لاک ڈاؤن کے موقع پر بنی گالہ بھی پہنچ گئے تھے لیکن پی ٹی آئی کی جانب سے انہیں اہمیت نہیں دی گئی،
جس کے بعد انہوں نے دوبارہ پیپلز پارٹی میں شمولیت اختیار کرلی تھی لیکن پی پی میں شامل ہونے کے باوجود نبیل گبول پیپلز پارٹی کے پلیٹ فارم سے بہت زیادہ متحرک نظر نہیں آرہے ہیں اور پانامہ لیکس کے فیصلے کے بعد جس طرح ملک کا سیاسی منظر نامہ تبدیل ہوا ہے اس کے بعد بہت سے سیاسی پنچھیوں کو ایک مرتبہ پھر نئے سیاسی آشیانوں کی تلاش ہے بہت ممکن ہے نبیل گبول کی پیر پگارا سے ملاقات کی نوعیت بھی اسی طرح کی ہو۔دریں اثناء سابق گورنرسندھ ڈاکٹرعشرت العباد خان نے بھی حروں کے روحانی پیشوا پیرپگاراسے ملاقات متوقع ہے۔
