لاہور( این این آئی) حلقہ این اے 120سے تحریک انصاف کی امیدوار ڈاکٹر یاسمین راشد نے کہا ہے کہ شہباز شریف کو مشورہ ہے کہ ایک کی بجائے زیادہ حلقوں سے انتخاب لڑیں کیونکہ آپ کیلئے کامیابی کا کوئی چانس نہیں ، نواز شریف چار سالوں میں ایک بار بھی اپنے انتخابی حلقے میں نہیں آئے ، شہباز شریف ہیٹ اور بوٹ پہن کر سیوریج کے پانی میں ڈوبے حلقے میں ووٹ مانگنے کیلئے نکلیں ۔

یوم تشکر کی تقریب میں کارکنوں کے ہمراہ اسلام آباد روانگی سے قبل میڈیا سے گفتگو کرتے ہوئے انہوں نے کہا کہ پی ٹی آئی کے کارکن اور حلقے کے عوام بہت پرجوش ہیں اور وہ این اے 120سے پی ٹی آئی کے امیدوار کے نام کا اعلان ہوتے ہی انتخابی مہم شروع کرنے کے لئے بیتاب ہیں۔ اس حلقے میں پیسے والے لوگ نہیں جنون والے لوگ ہیں جو (ن) لگ کو چھوڑ کر پی ٹی آئی میں شامل ہو رہے ہیں ۔ ہم حکومتی مشینری او راس کی دھونس دھاندلی کا ڈٹ کر مقابلہ کریں گے اور کامیابی حاصل کریں گے۔ ڈاکٹر یاسمین راشد نے کہا کہ نواز شریف نے چار سالوں میں ایک بار بھی این اے 120کا دورہ نہیں کیا اور حلقے کی حالت سب کے سامنے ہے ۔ شہباز شریف ہیٹ اور بوٹ پہن کر ووٹ مانگنے نکلیں گے تو انہیں لگ پتہ جائے گا ۔ شہباز شریف کو مشورہ ہے کہ وہ ایک حلقے کی بجائے زیادہ حلقوں سے لڑیں کیونکہ اب آپ کے لئے کامیابی کا کوئی چانس نہیں ۔