اسلام آباد(آن لائن)تحریک انصاف کے رہنما علی محمد خان نے کہا ہے کہ حکومت نے عمران خان کے خلاف دہشت گردی کا دو نمبر مقدمہ بنا یا ،ایسا کس ملک میں ہوتا ہے کہ عوامی لیڈر پر دہشت گردی کا مقدمہ بنا یا جائے ،عمران خان بنی گالا میں بیٹھے ہوئے ،میں چیلنج کرتا ہوں اگر کسی میں ہمت ہے تو انہیں پکڑ کر دکھائیں ۔سپریم کورٹ کے باہر میڈ یا سے گفتگو کرتے ہوئے انہوں نے کہا کہ وزیراعظم نواز شریف کے سامنے اسلام اور آخرت کی نہیں

بلکہ وزارت اور جیبیں بھرنے کی اہمیت ہے ۔انہوں نے کہا وزیراعظم نے پارلیمنٹ میں کہا تھا کہ اثاثوں کے ذرائع موجود ہیں اور یہ ہیں وہ ذرائع ،آج قوم پوچھ رہی ہے کہ کہاں ہیں وہ ذرائع ؟،نواز شریف قوم کو گمراہ کر رہے ہیں ،وہ سمجھتے ہیں قوم کم عقل ہے ،اگر وہ واقعی سچے ہیں تو منی ٹریل لا کر دکھا دیں ۔علی محمد خان نے کہا کہ نواز شریف نے اپنے آپ کو احتساب کے لیے پیش نہیں کیا بلکہ ہم انہیں کھینچ کر لائے ہیں ،ہم نے طاقتور کو عدالت کے سامنے سر نگوں کیا ۔