اسلام آباد (مانیٹرنگ ڈیسک) شہباز شریف کی نااہلی کی درخواست، تفصیلات کے مطابق لاہور ہائی کورٹ نے وزیراعلیٰ پنجاب شہباز شریف کی نا اہلی کے لیے تحریک انصاف کے چیئرمین عمران خان کی طرف سے دائر کی گئی درخواست سماعت کے لیے منظور کر لی ہے، ہائی کورٹ کے جسٹس شاہد کریم کل شہباز شریف کی نااہلی کی درخواست پر سماعت کریں گے۔ تحریک انصاف کے چیئرمین عمران خان کی طرف سے دائر کی گئی
وزیراعلیٰ پنجاب شہباز شریف کی نااہلی کی درخواست میں موقف اختیار کیا گیا ہے کہ محمد شہباز شریف عوامی عہدہ رکھنے کے ساتھ ساتھ ذاتی کاروبار سے بھی منسلک رہے، وزیراعلیٰ پنجاب شہباز شریف نے اپنے بڑے بھائی نوازشریف کو 6 ارب کے تحائف دیے جس کا شہبازشریف نے کسی منی ٹریل میں ذکر نہیں کیا، عمران خان کی طرف دائر کی گئی درخواست میں پاناما کیس کی مشترکہ تحقیقاتی ٹیم کی طرف سے مرتب کردہ رپورٹ کا بھی حوالہ دیا گیا اور کہا گیا کہ جے آئی ٹی رپورٹ میں شریف خاندان کے اثاثے آمدن سے مماثلت نہیں رکھتے۔ اس درخواست میں عدالت سے استدعا کی گئی ہے کہ وزیراعلیٰ محمد شہباز شریف کو عوامی عہدہ رکھتے ہوئے کاروبار کرنے اور اس عہدے کا غلط استعمال کرنے پر عہدے سے ہٹایا جائے۔ تحریک انصاف کی جانب سے دائر کی گئی یہ درخواست عدالت نے ابتدائی سماعت کے لیے منظور کر لی ہے، اس کی سماعت جسٹس شاہد کریم منگل کے دن کریں گے۔
