لاہور ( این این آئی) مسلم لیگ (ن) کی رکن پنجاب اسمبلی شاہجہاں کے گھر میں 16سالہ ملازم اختر کی پوسٹ مارٹم رپورٹ منظر عام پر آگئی جس کے مطابق مقتول کے جسم پر تشدد کے نشانات پائے گئے ہیں۔تفصیلات کے مطابق منگل کے روز اکبری گیٹ کے علاقے میں لیگی ایم پی اے شاہجہاں کے گھر میں مبینہ تشدد سے سولہ سالہ اختر جان کی بازی ہار گیا۔ ورثاء کے احتجاج کرنے پر پولیس نے لاش کو تحویل میں لے کر مقدمہ درج کر لیا اور لاش کو پوسٹ مارٹم کے لیے مردہ خانے منتقل کر دیا۔

سولہ سالہ اختر کی پوسٹ مارٹم رپورٹ منظر عام پر آ گئی ہے۔ رپورٹ کے مطابق اختر کو تشدد کا نشانہ بنایا گیا۔مقتول کے جسم کے مختلف حصوں پر تشدد کے نشانات ملے ہیں ۔ مقتول کے جسم کے نازک حصوں پر گہری ضربیں بھی موت کی وجہ بنیں۔ مقتول کو استری سے بھی جلایا جاتا رہا۔ مقدمے میں نامزد لیگی ایم پی اے کی بیٹی فوزیہ نے عدالت سے عبوری ضمانت لے رکھی ہے۔

موضوعات:رکن پنجاب اسمبلی شاہجہاں سولہ سالہ اختر جان مقتول