نیویارک (این این آئی)ڈونلڈ ٹرمپ ایک زمانے میں ٹی وی اسٹار تھے اور اب وہ امریکا کے صدر کی حیثیت سے وائٹ ہائوس میں مقیم ہیں، جس نے ہولی وڈ کے دیگر افراد کو بھی سیاسی میدان میں قسمت آزمائی پر غور کرنے پر مجبور کردیا ہے

ان میں سب سے نمایاں ڈیوائن جانسن المعروف دی راک ہیں۔ہالی ووڈ کے سب سے زیادہ کمانے والے اداکار اور سابق مقبول ترین ریسلر دی راک نے جی کیو سے انٹرویو کے دوران امریکی صدارت کی دوڑ کا حصہ بننے کے سوال پر کہا کہ میرے خیال میں یہ ایک حقیقی امکان ہے۔انہوں نے کہا کہ 2016 کے صدارتی انتخابات کے دوران ہیلری کلنٹن اور ڈونلڈ ٹرمپ دونوں ان کی حمایت کے خواہشمند تھے۔انہوں نے کہاکہ مجھے ایسا لگتا کہ میں ایسی پوزیشن میں ہوں جہاں میرے الفاظ کا وزن اور اثر بہت زیادہ ہے، یہی وجہ ہے کہ وہ میری حمایت چاہتے تھے، مگر میں اس عمل کا بہت احترام کرتا ہوں اور مجھے لگتا ہے کہ اگر میں عوامی سطح پر اپنے سیاسی خیالات کا اظہار کروں تو کچھ چیزیں ہوں گی، ہوسکتا ہے کہ لوگ ناخوش ہوجائیں یا وہ اس سے متاثر ہوجائیں تو میں ایسا نہیں کرنا چاہتا۔ماضی میں بھی دی راک سیاست میں دلچسپی کا اظہار کرچکے ہیں اور گزشتہ سال ایک انٹرویو کے دوران انہوں نے کہا کہ مجھے ملک سے محبت ہے، مجھے اب لگتا ہے کہ قیادت بہت اہمیت رکھتی ہے، اچھی قیادت بہت اہم ہے، قابل احترام قیادت بہت اہم ہے۔اسی طرح ایک اور انٹرویو میں انہوں نے کہا تھا کہ  میں 2020 کے صدارتی انتخابات کا حصہ بننے کا امکان رد نہیں کرسکتا، یہ لوگوں کی مدد کا بہترین موقع ہوگا تو ایسا بالکل ممکن ہے، حالیہ انتخابات کے نتائج سے ثابت ہوتا ہے کہ کچھ بھی ممکن ہے۔