اسلام آباد(مانیٹرنگ ڈیسک) موٹر سائیکلز بنانے والی پاکستانی کمپنی سپر پاور نے سستی اور چھوٹی گاڑی متعارف کروا دی۔ تفصیلات کے مطابق موٹرسائیکل برانڈ کے حوالے سے معروف کمپنی سپر پاور نے اپنی دو الیکٹرک گاڑیاں گزشتہ دنوں کراچی ایکسپو سینٹر میں ایک نمائش کے دوران پیش کیں۔توقع ہے کہ آئندہ تین ماہ کے دوران ان الیکٹرک گاڑیوں کی فروخت شروع ہوجائے گی۔کمپنی آفیشلز کا کہنا تھا کہ ‘ اس گاڑی کاٹارگٹ مارکیٹ مخصوص نہیں، ہر عمر کے افراد اس گاڑی کو چلا سکتے ہیں، ای گاڑیوں
کی مارکیٹ آئندہ برسوں میں تیزی سے پھیلے گی اور اسی لیے ہم نے اس شعبے میں قدم رکھنے کا فیصلہ کیا۔ان گاڑیوں کے دو ورژن متعارف کرائے گئے ہیں، ایک دو دروازوں جبکہ دوسرا چار دروازوں والا ہے۔پہلے کی قیمت چھ لاکھ اور دوسرے کی ساڑھے چھ لاکھ ہے اور یہ آئندہ تین ماہ میں پاکستان میں فروخت کے لیے پیش کیے جانے کا امکان ہے۔یہ گاڑیاں زیادہ سے زیادہ 50 کلو میٹر فی گھنٹہ کی رفتار سے سفر کرسکیں گی جبکہ 7 گھنٹے چارج کرنے پر یہ 120 کلو میٹر تک کا فاصلہ طے کرسکتی ہیں۔
