دبئی (آئی این پی)پاکستان سپر لیگ(پی ایس ایل) کے دوسرے ایڈیشن کی تیاریاں عروج پر پہنچ گئیں ، دبئی اور شارجہ میں اشتہاری مہم کا آغاز بسوں ، ٹیکسیوں پر ہوگیا۔آٹھ فروری کو دبئی انٹرنیشنل کرکٹ سٹیڈیم میں نامور فنکار، علی ظفر، شہزاد رائے، فہد مصطفٰی، شہکی اور نجم سیٹھی پریس کانفرنس میں افتتاحی پروگرام کی تفصیلات سے آگاہ کریں گے۔
اس موقع پر تمام فرنچائز کے مالکان اور ٹیمیں بھی موجود ہوں گی ، پی ایس ایل کا آغاز 9 فروری کو دبئی کرکٹ سٹیڈیم میں ہوگا ، افتتاحی میچ پشاور زلمی اور اسلام آباد یونائیٹڈ کے درمیان رات 9 بجے کھیلا جائیگا۔میچ سے قبل گلوکار پرفارمنس دیں گے ، آتش بازی کا بھی زبردست مظاہرہ بھی ہوگا۔ لیگ کے آغاز سے قبل ہی شائقین کا جوش و خروش عروج پر پہنچ چکا ہے۔ہر طرف بینرز اور پمفلٹس کی بہار ہے ، گاڑیوں ، بسوں اور عمارتوں پر فلیکس نظر آ رہے ہیں ، شہریوں کی بڑی تعداد پی ایس ایل کے میچز گراؤنڈ میں جا کر دیکھے گی۔
