ملتان(آئی این پی ) وزیراعظم نواز شریف نے ملتان میں میٹرو بس سروس کا افتتاح کردیا۔منگل کو چنگی نمبر 9 میں ہونے والی افتتاحی تقریب میں گورنر پنجاب رفیق رجوانہ اور وزیراعلیٰ شہباز شریف سمیت صوبائی وزیر قانون رانا ثنا اللہ اور دیگر اعلیٰ حکام بھی وزیراعظم نوازشریف کے ہمراہ تھے۔ لاہور اور راولپنڈی کے بعد ملتان کے لیے شروع کیے گئے
میٹرو بسمنصوبے سے شہر کے 25 لاکھ افراد مستفید ہوں گے، عوامی فلاح کے اس بڑے منصوبے پر 28 ارب 88 کروڑ روپے لاگت آئی ہے۔ 18 اعشاریہ 5 لومیٹر طویل ٹریک اور 21 اسٹیشنز پر مشتمل اس بس سروس کا کرایہ 20 روپے ہوگا۔ وزیراعظم نے حسب روایت میٹرو بس میں خود سفر کرکے اس کا آغاز کیا۔ ملتان میٹرو منصوبہ 18 کلومیٹر طویل روٹ پر مشتمل ہے اور اس روٹ پر ٹریفک کی روانی برقرار رکھنے کے لیے 14 فلائی اوورز تعمیر کیے گئے ، روٹ کے دونوں جانب 14 ہزار پودے لگائے گئے۔ اس منصوبے پر 28 ارب 50 کروڑ روپے لاگت آئی ، اس سے روزانہ کم و بیش 95 ہزار افراد استفادہ حاصل کرسکیں گے اور اس کا کرایہ 20 روپے ہوگا۔واضح رہے کہ 20 روپے کرایے کے ساتھ میٹرو بس کے معاملات چلانے کیلئے حکومت کو بھاری سبسڈی دینی پڑتی ہے ۔ دیگر شہروں میں میٹرو کے خسارے اور سبسڈی کو مد نظر رکھتے ہوئے میٹرو بس کا یکطرفہ کرایہ بڑھانے پور غور کیا جا رہا تھا لیکن حکومت نے اب کرایہ 20 روپے رکھنے کا ہی فیصلہ کیا ہے۔
