کراچی (مانیٹرنگ ڈیسک)صوبہ سندھ کے دارلحکومت کراچی کے علاقے کورنگی میں قبرستان سے مردے غائب ہونے کا انکشاف ہوا ہے۔ایک نجی ٹی وی رپورٹ کے مطابق کورنگی کے قبرستان سے مردے غائب ہونے کا لرزہ خیز انکشاف ہوا ہے۔کورنگی قبرستان سے تین روز کا بچہ دفنائے جانے کے اگلے ہی روز قبر سے غائب ہوگیا۔کورنگی کے ایک مکین فرحان نامی شہری کے تین روز کے بچے کا نمونیا کے سبب جناح ہسپتال میں انتقال ہوگیا تھا ۔جس کی تدفین کورنگی کے قبرستان میں کی گئی۔
فوت شدہ بچے کا والد فرحان اگلے روز ہی 15 جنوری کو قبر پکی کرانے قبرستان پہنچا تو قبر کھلی ہوئی تھی اور اس میں سے بچے کی لاش غائب تھی جس کے بعد فرحان نے تھانے میں رپورٹ کرائی۔گورکن سے تھانے میں پوچھا گیا تو اس نے بیان دیا کہ ممکن ہے کسی جانور نے بچے کو کھالیا ہو تاہم اگلے ہی روزدوبارہ فرحان کو گورکن کو فون آیا کہ بچے کی لاش قبر میں موجود ہے۔فرحان وہاں پہنچا تو بچے کی لاش وہاں موجود تھی لیکن کفن غائب تھا۔جس پر پولیس نے گورکن کے خلاف مقدمہ درج کرکے تحقیقات شروع کردی ہیں ۔
