اسلام آباد (مانیٹرنگ ڈیسک) اٹارنی جنرل پاکستان نے سوشل میڈیا پر چلنے والی صدر ممنون حسین، وزیراعظم میاں محمد نواز شریف، گورنر خیبر پی کے اقبال ظفر جھگڑا کی تصاویر اور کیپشن کے حوالے سے نوٹس لیتے ہوئے مذکورہ افراد کی کردارکشی اور بے بنیاد پراپیگنڈے سے متعلق وزارت قانون و انصاف، وزارت انفارمیشن ٹیکنالوجی سے وضاحت طلب کرلی ہے۔
نجی اخبار کے مطابق کے مطابق اٹارنی جنرل آفس کی جانب سے لکھے لیٹر میں کہا گیا ہے کہ سوشل میڈیا، انٹرنیٹ ویب سائٹس پر انفرادی اور گروپس کی جانب سے تصاویری اور تحریری مواد کی تشہیر کی جارہی ہے اور حکمران شخصیات کا نامزد چیف جسٹس سے تعلق جوڑ کر غلط تاثر قائم کیا جارہا ہے۔ یہ ایک آئینی ادارے سپریم کورٹ کی ساکھ، آئینی عہدے کو بدنام کرنے کی سازش ہے جو قابل سزا جرم ہے۔ ملوث عناصر کی نشاندہی اور ان کے خلاف کارروائی کے لئے متعلقہ اداروں سے وضاحت طلب کی گئی ہے۔
دریں اثناء وزیر داخلہ چودھری نثار علی خاں نے اٹارنی جنرل کے خط کا نوٹس لیتے ہوئے نامزد چیف جسٹس کے بارے میں سوشل میڈیا پر پراپیگنڈہ کرنے والوں کیخلاف ایف آئی اے کو کارروائی کا حکم دیدیا۔ انہوں نے ہدایت کی کہ جھوٹی تصویر کے پیچھے جو بھی ہے، اسے اقوام کے سامنے لایا جائے۔