گوجرانوالہ (آن لائن) سرد موسم میں گرم گرم پکوڑے کھانے تقریباً ہرکسی کو ہی پسند ہے لیکن پاکستان ریلوے کے ایک ڈرائیور کا سرد موسم میں پکوڑے دیکھ کر دل کچھ ایسا للچایا کہ پٹری کے قریب دکان دیکھ کر انجن روک کر پکڑے لینے چلا گیا اور اس کا اسسٹنٹ 20 منٹ تک انتظار کرتا رہا۔
تفصیلات کے مطابق ریلوے کا ڈرائیور خالی انجن لے کر شمس آباد کے علاقے سے گزر رہا تھا کہ پٹری کے قریب پکوڑوں کی دکان دیکھ کر اس نے گرما گرم پکوڑے کھانے کیلئے انجن روک لیا اور پکوڑے لینے چلا گیا تاہم اس کا اسسٹنٹ انجن میں ہی موجود رہا۔
ریلوے ذرائع کے مطابق جس جگہ انجن روکا گیا وہ سنگل ٹریک ہے اور اگر اس دوران دوسری ٹرین آ جاتی تو حادثہ یقینی تھا۔ ڈرائیو رپکوڑے خریدنے کا ’مشن‘ مکمل کر کے واپس آیا تو کیمرے دیکھ کر منہ چھپانے لگا اور افراتفری میں انجن پر چڑھا اور روانہ ہو گیا۔ریلوے حکام کے مطابق مذکورہ ذمہ داران کو نا اہلی دکھانے پر نوکری سے معطل کر دیا گیا ہے۔

موضوعات:پکوڑے ٹرین