اسلام آباد(مانیٹرنگ ڈیسک)پاکستان ایروناٹیکل کمپلیکس کامرہ کے چیئرمین ایئر مارشل ارشد ملک قومی اسمبلی کی مجلس قائمہ برائے دفاعی پیداوار کو بتایا ہے کہ ترکی کو دو ماہ کے اندر باون عدد تربیتی جیٹ طیارے سپر مشاق فراہم کرنے کے طریقہ کارکو حتمی شکل دی جارہی ہے جب کہ قطر کو مارچ یا اپریل میں چھ سپر مشاق طیارے فراہم کئے جائیں گے۔ مجلس قائمہ کا اجلاس ، صدر مجلس خواجہ سہیل منصور کی زیر صدارت پارلیمنٹ ہاؤس میں منعقد ہوا۔
شرکاءاجلاس نے سابق آرمی چیف جنرل (ر) راحیل شریف کی خدمات کو خراج تحسین پیش کیا اور امید ظاہر کی کہ نئے آرمی چیف جنرل قمر جاوید باجوہ بھی اسی رفتاراور عزم کے ساتھ عوام کے تحفظ کا مشن جاری رکھیں گے۔ اجلاس کو بریفنگ دیتے ہوئے ایئر مارشل ارشد ملک نے بتایا کہ ابتدائی تربیت کے لئے تین سو سپر مشاق طیارے تیار کئے گئے ہیں ۔ یہ طیارہ رن وے کے بغیر بھی لینڈنگ کی صلاحیت رکھتا ہے۔گذشتہ چھ ماہ کے دوران نائیجریا‘قطر اور ترکی کو تربیتی طیارے فراہم کرنے کے معاہدے کئے گئے ہیں۔ ان دفاعی معاہدوں کی بدولت پاکستان کو خطیر زرمبادلہ حاصل ہوگا ۔ حالیہ چار ماہ کے دوران نائجریا کو چار تربیتی طیارے اور ماسٹر ٹرینرفراہم کرچکے ہیں جب کہ زمبابوے ‘ تنزانیہ ‘کیمرون اور دیگر ممالک بھی تربیتی طیارے حاصل کرنے میں دلچسپی رکھتے ہیں ۔ ستر عدد جے ایف تھندر لڑاکا طیارے پاکستان ایئر فورس کے حوالے کئے گئے ہیں۔
