اسلام آباد (این این آئی) پاک، ترک اساتذہ نے حکومتی فیصلے کے خلاف اسلام آباد ہائیکورٹ سے رجوع کرنے کا فیصلہ کر لیا ۔تفصیلات کے مطابق حکومت نے پاک ٗترک سکولوں کے اساتذہ کو 20 نومبر سے پہلے ملک چھوڑنے کی ہدایت کی ہے ٗ ان سکولوں کی بندش کا کیس پہلے ہی عدالت میں چل رہا ہے تاہم حکومت نے ترک صدر کے دورہ پاکستان کے پیش نظر فیصلہ کرتے ہوئے 108 اساتذہ کو ملک بدری کے احکامات دئیے تھے۔دریں اثناء پشاور(این این آئی)پاک ترک اسکولوں کے اساتذہ کو ملک چھوڑنے کے حکم کے خلاف اساتذہ اورطلباء نے پاک ترک سکول کے سامنے احتجاجی مظاہرہ کیا۔طلباء نے حیات آباد میں پاک ترک سکول کے سامنے احتجاجی مظاہرہ کیا ،

بچوں نے حکومت سے مطالبہ کیا کہ ہمارے اساتذہ کوواپس نہ بھجوائے جائے۔پاک ترک اسکولوں کے اساتذہ کو تین دن میں ملک چھوڑنے کے حکم کے بعد پشاور میں درجنوں طلبہ کے والدین غیر یقینی صورتحال سے دوچار ہو گئے ہیں۔ وزارت داخلہ نے پاک ترک سکول اینڈ کالج کے ایک سو بیس اساتذہ کو ملک چھوڑنے کا اعلامیہ جاری کردیا ہے جس کے باعث پاک ترک میں زیر تعلیم طلباء کا مستقبل تاریک ہونے کا خدشہ پیدا ہوگیا۔ حکومتی فیصلے کے باعث زیر تعلیم طلباء کے والدین میں تشویش بڑھ گئی۔ والدین نے حکومتی فیصلہ کے خلاف عدالت سے رجوع کرنے کا فیصلہ بھی کیاہے۔ دوسری جانب اسکول انتظامیہ کا کہنا ہے کہ پاک ترک سکول اینڈ کالج نجی ادارہ ہے، تعلیمی اداروں کی بندش سے انہیں کوئی مسئلہ نہیں تاہم طلباء کا مستقبل داو پر لگ سکتا ہے ۔ انتظامیہ کا کہنا ہے کہ سکول پاکستانی قوانین کے تحت چلایا جارہا ہے جو کہ پاک ترک ایجوکیشن فاونڈیشن کے نام سے رجسٹرڈ پاکستانی کمپنی کے پاس ہے۔کمپنی کے چیئرمین اور بورڈ اْف ڈائرکٹر میں شامل ارکان کا تعلق پاکستان سے ہے۔