برلن/اسلام آباد (آئی این پی)سابق وفاقی وزیر داخلہ رحمان ملک نے انکشاف کیا ہے کہ بلوچستان کا علاقہ داعش اور طالبان کے لیے محفوظ پناہ گاہ کے طور پر استعمال ہورہا ہے اور افغانستان کے راستے دہشت گرد باآسانی بلوچستان آتے جاتے ہیں، عراق اور شام میں مزارات کو نشانہ بنانا داعش نے ہی شروع کیا تھا جبکہ پاکستان میں اس سے قبل مزارات پر جتنے بھی حملے ہوئے ان میں لشکر جھنگوی ملوث پائی گئی۔جرمن خبررساں ادارے ’’ڈی ڈبلیو‘‘ کے مطابق سابق وفاقی وزیر داخلہ رحمان ملک کا کہنا ہے کہ بلوچستان کا علاقہ داعش اور طالبان کے لیے محفوظ پناہ گاہ کے طور پر استعمال ہورہا ہے اور افغانستان کے راستے دہشت گرد باآسانی بلوچستان آتے جاتے ہیں۔ رحمان ملک کا کہنا ہے کہ بلوچستان میں ان دہشت گردوں کو مقامی طور پر مکمل مدد فراہم کی جاتی ہے۔ ان کا کہنا تھا کہ دہشتگردوں نے پہلے کوئٹہ کو ٹارگٹ کیا اور اب ایسے مقام پر واقع مزار کو نشانہ بنایا گیا ہے جہاں کئی میل تک کوئی سہولت ہی موجود نہیں ہے۔ سابق وزیر داخلہ کا مزید کہنا تھا کہ عراق اور شام میں مزارات کو نشانہ بنانا داعش نے ہی شروع کیا تھا جبکہ پاکستان میں اس سے قبل مزارات پر جتنے بھی حملے ہوئے ان میں لشکر جھنگوی ملوث پائی گئی۔واضح رہے کہ درگاہ شاہ نورانی میں ہونیوالے خودکش حملے میں 52افراد جاں بحق اور 100سے زائد زخمی ہوگئے تھے ۔وزیر داخلہ بلوچستان سرفراز بگٹی نے دھماکے میں براہ راست بھارتی خفیہ ایجنسی را اور افغان خفیہ ایجنسی این ڈی ایس کو ملوث قرار دیا تھا۔

موضوعات:داخلہ رحمان