لاہور( این این آئی)پاکستان تحریک انصاف کے کارکنوں نے قیادت کے ’’ سو لو فلائٹ ‘‘ فیصلوں پر شدید ناراضگی کا اظہار کرتے ہوئے اپنا احتجاج ریکارڈ کرانا شروع کر دیا ، مرکزی رہنماؤں کے موبائل فونز پر پیغامات کے ذریعے فیصلوں سے ہونے والی سبکی سے آگاہ کیا جارہا ہے ،پنجاب سے تعلق رکھنے والے کارکنوں کے باہر نہ نکلنے پر تحقیقات اوررہنماؤں کے احتساب کا بھی مطالبہ کر دیا گیا ۔
پی ٹی آئی کے ذرائع کے مطابق تحریک انصاف کے کارکنوں کی اکثریت کی طرف سے قیادت کے حالیہ فیصلوں پر نہ صرف شدید ناراضگی دکھائی جارہی ہے بلکہ اس پر باضابطہ احتجاج بھی ریکارڈ کرایا جارہا ہے ۔ جس میں کہا گیا ہے کہ قیادت کو جلد بازی میں انتہا کی سطح پر جا کر اعلانات اور ڈیڈ لائن نہیں دینی چاہیے ۔
قیادت کی طرف سے دو نومبر کو دھرنے کا اعلان تو کر دیا گیا لیکن ذمہ دار رہنماؤں نے کارکنوں اور عوام کو اس کیلئے تیار کرنے کی ذمہ داری نہیں نبھائی ۔ قیادت مشاورت سے فیصلے کرے اور جلد بازی میں آخری حد تک جانے کی بجائے فیصلوں میں گنجائش رکھی جائے تاکہ نہ صرف با عزت واپسی کا راستہ بچ سکے بلکہ کارکن اپنے سیاسی مخالفین کی بحث کا دلیل سے جواب دے سکیں۔ ذرائع کے مطابق کارکنوں کے پاس جن رہنماؤں کے موبائل فون نمبرز موجود ہیں ان پر احتجاجی پیغامات بھجوائے جارہے ہیں ۔ ایک اور ذرائع کے مطابق کارکنوں نے پنجاب سے کارکنوں کے باہر نہ نکلنے پر بھی اس کی ذمہ داری رہنماؤں پر عائد کرتے ہوئے قیادت سے اس کی تحقیقات اور ان کے احتساب کا بھی مطالبہ کیا ہے ۔
