اسلام آباد(آئی این پی) وفاقی وزیر خزانہ اسحاق ڈار کو 2016کے لئے جنوبی ایشیا کا بہترین وزیر خزانہ قرار دے دیاگیا۔ یہ فیصلہ آئی ایم ایف کے میگزین اور ورلڈ بینک کے سالانہ اجلاس میں کیاگیا تاہم وزیر خزانہ لائن آف کنٹرول پر بھارتی جارحیت سے پیداشدہ صورتحال ، مشترکہ اجلاس اور آل پارٹیز کانفرنس اور دیگر اہم سرگرمیوں کی وجہ سے دورہ امریکہ ملتوی کر چکے ہیں ، ان کی جگہ امریکہ میں پاکستان کے سفیر جلیل عباس جیلانی یہ ایوارڈ وصول کریں گے ۔ آئی ایف اور عالمی بینک کے سالانہ اجلاس کے میگزین ایمرجنگ مارکیٹس (ابھرتی ہوئی مارکیٹیں ) نے وفاقی وزیر خزانہ اسحاق ڈار کو 2016کے لئے جنوبی ایشیا کا بہترین وزیر خزانہ قراردے دیا۔ ایمر جنگ مارکیٹس اخبار کی جانب سے وفاقی وزیر خزانہ کو لکھے گئے خط میں آگاہ کیا گیا ہے کہ انہیں 2016کے لئے جنوبی ایشیا کا بہترین وزیر خزانہ نامزد کیا گیا ہے ۔ خط کے مطابق عالمی فنانشل مارکیٹ میں مشکل حالات کے باوجود وزیرخزانہ اسحاق ڈار کی قیادت میں پاکستان کی معیشت میں بہتری لانے کے حوالے سے کوششوں کا اعتراف کیا گیا ہے جس کے تحت غیر ملکی سرمایہ کاری میں اضافہ ، عالمی کیپیٹل مارکیٹس میں پاکستان کی موجودگی ، سٹاک مارکیٹس میں سیکیورٹیز کے حوالے سے قانون سازی، سٹاک مارکیٹوں کا ادغام کرکے پاکستان سٹاک ایکسچینج کے نام سے ایک بڑی سٹاک مارکیٹ کا قیام اور چین کے ساتھ بڑھتے ہوئے اہم تعلقات سمیت اہم اقدامات کئے گئے ہیں ۔ وزیرخزانہ کو واشنگٹن میں ایوارڈ وصول کرنے کے لئے تقریب میں مدعو کیا گیا ہے ۔ واضح رہے کہ وزیر خزانہ اسحاق ڈار نے لائن آف کنٹرول کی صورتحال ، آل پارٹیز کانفرنس،پارلیمنٹ کے مشترکہ اجلاس اوردیگر سرگرمیوں کی وجہ سے دورہ امریکہ ملتوی کردیا تھا۔حکومتی ذرائع کے مطابق ایوارڈ آئی ایم ایف اور عالمی بینک کی جانب سے پاکستان کی معاشی کاکردگی کا اعتراف ہے ۔ وفاقی وزیر خزانہ اسحاق ڈار کی جانب سے یہ ایوارڈ امریکہ میں پاکستان کے سفیر جلیل عباس جیلانی آئی ایم ایف اور عالمی بینک کے ہونے والے سالانہ اجلاس میں وصول کریں گے ۔