اسلام آباد(آئی این پی)عوامی مسلم لیگ کے سربراہ شیخ رشید احمد نے کہا ہے کہ آصف علی زرداری پاکستان آنے کے لئے بے چین ہیں ، مجھے یقین ہے کہ 30اکتوبر تک پانامہ لیکس کا نتیجہ آجائے گا، اگر قوم تبدیلی چاہتی ہے تو تبدیلی کے لئے نکلنا چاہیے ، 2013سے اتنے پیسے ملک سے باہرکیوں گئے ، بلاول پر بات کرنے سے لوگ ناراض ہو جاتے ہیں ، مسئلہ کشمیر پر حکومت کے پاس کو وژن نہیں ہے ۔ وہ جمعہ کو نجی ٹی وی کے پروگرام سے گفتگو کررہے تھے ۔انہوں نے کہا کہ آصف زرداری کی گرفتاری کیلئے پوری تیاری کی گئی تھی ، آصف علی زرداری پاکستان آنے کے لئے پہلے بھی بے چین تھے اور اب بھی ، انہوں نے کہا کہ عوام اگر تبدیلی چاہتی ہے تو 30اکتوبر کو پاکستان تحریک انصاف کا ساتھ دے کر گھروں سے نکلے اور اگر عوام چپ بیٹھے گی تو پاکستان میں کرپشن اسی طرح جاری رہے گی ۔ سربراہ عوامی مسلم لیگ نے کہا کہ میں نے بلاول بھٹو سے کہا تھا کہ نانا کی طرح سیاست کریں ، بلاول پر بات کرنے سے لوگ مجھ سے ناراض ہو جاتے ہیں ، قومی اسمبلی میں جو صورتحال اختیار کی گئی یہ سارا خورشید شاہ کا ڈرامہ تھا، اجلاس بھی خورشید شاہ کے اشارے پر بلایا گیا تھا۔