اسلام آباد (خصوصی رپورٹ ) پاک بھارت کشیدگی اور کشمیر میں بھارت کے بڑھتے ہوئے مظالم کے بعد پاکستان کے بڑوں نے سر جوڑ لئے ہیں اور فیصلہ کیا گیا ہے کہ بھارت سے کسی بھی قسم کے کوئی مذاکرات نہیں کیے جائیں گے۔ اور کہا گیا ہے کہ اب کی بار پہل پاکستان کو نہیں بلکہ بھارت کو کرنا ہوگی ۔ اس حوالے سے پاکستان کی سیاسی اور عسکری قیادت نے کشمیر میں انسانی حقوق کی خلاف ورزیاں روکنے تک بھارت سے مذاکرات نہ کرنے کا فیصلہ کر لیا ہے جبکہ مشیر قومی سلامتی کو بھارت سے رابطے جاری رکھنے کی بھی ہدایت جاری کی ہے ۔ تفصیلات کے مطابق پاکستان کی سیاسی اور عسکری قیادت نے کشمیر میں انسانی حقوق کی خلاف ورزیاں روکنے تک بھارت سے مذاکرات نہ کرنے کا فیصلہ کر لیا، پہل بھی بھارت کو کرنا ہو گی، مشیر قومی سلامتی کو بھارت سے رابطے جاری رکھنے کی بھی ہدایت جاری کردی۔
ذرائع کے مطابق قومی سلامتی کمیٹی کےاجلاس میں فیصلہ کیاگیاکہ اب تعلقات کی بحالی کیلئےبھارت کوناصرف پہل کرناہوگی بلکہ مقبوضہ کشمیرمیں انسانی حقوق کی خلاف ورزیاں روکنی ہوں گی، مقبوضہ وادی کےعوام کیلئے بہترفضا قائم کرنی ہو گی، بھارت کو سرحدی خلاف ورزیاں روکنے کا بھی عملی مظاہرہ کرنا ہو گا ۔اجلاس میں یہ بھی فیصلہ ہواکہ مشیرقومی سلامتی اپنے بھارتی ہم منصب سے ٹیلی فونک رابطہ کرکےتفصیلات سےآگاہ کریں گے۔ ذرائع کا کہنا ہے کہ مشیرقومی سلامتی ناصر خان جنجوعہ نےبریفنگ دی کہ بھارتی ہم منصب اجیت دول نے پیشکش کی کہ اب کہیں ملتے ہیں۔اجلاس میں اس پیشکش پر بھی تفصیلی غورکے بعد اتفاق کیاگیاکہ بھارتی مشیر قومی سلامتی سے ابھی ملاقات مناسب نہیں، ملاقات سے تاثر جائے گا کہ سرحد پر فوجی شہید ہو رہے ہیں اور دوسری طرف ملاقاتیں ہو رہی ہیں،ملاقات سےیہ پیغام بھی جائےگا کہ کشمیری گولی کھا رہے ہیں اور پاکستان بھارت سے پینگیں بڑھا رہاہے۔تاہم قیادت نےناصر جنجوعہ کو بھارتی منصب سے ٹیلی فونک رابطہ برقرار رکھنے کی ہدایت کی تاکہ بھارت کی طرف سے عملی اقدامات اٹھائے جانے پر معاملات آگے بڑھ سکیں۔ واضح رہے کہ بھارت کی جانب سے پاکستان کی سرحدوں کی مسلسل خلاف ورزی جاری ہے ۔