لاہور ( این این آئی)سنی اتحاد کونسل کے زیر اہتمام منعقدہ اہلسنّت جماعتوں کے مشترکہ اجلاس کے اعلامیہ میں کہا گیا ہے کہ 30اہلسنّت جماعتیں کرش انڈیا مہم اور نظام مصطفی نافد کرو تحریک چلائیں گی،جعلی جہادیوں کے خلاف اجتماعی جامع شرعی فتویٰ جاری کرنے کیلئے علماء کی کمیٹی قائم کردی گئی ہے۔ بھارتی جارحیت کی صورت میں فوج کے ساتھ محاذ پر لڑنے کیلئے رضا کاروں کی فہرستیں تیار کرنے کا فیصلہ کر لیا گیا۔ 29اکتوبر کو راولپنڈی میں ملک گیر ’’ پاکستان زندہ باد کنونشن‘‘ ہو گا۔ یکم تا 10محرم ’’عشرہ پیغام حسین ‘‘ منایا جائے گا۔ اسلام کے خلاف پروپیگنڈہ کے جواب کیلئے یورپی ملکوں میں صداقت اسلام کانفرنسیں منعقد کی جائیں گی۔ پاکستان کا اسلامی تشخص ختم کرنے کی سازشیں روکیں گے۔ قانون ناموس رسالت میں تبدیلی برداشت نہیں کی جائے گی۔ محرم کے بعد حکومت کو نفاذ نظام مصطفی پر مجبور کرنے کیلئے مختلف شہروں میں دھرنے بھی دیئے جائیں گے۔ سودی نظام اور عریانی و فحاشی کے خلاف زوردار آواز اٹھائی جائیگی۔ دینی مدارس کے خلاف کو ئی سازش کامیاب نہیں ہونے دیں گے۔ حکومت دو قومی نظریے کے مخالفین کو قومی اتحاد سے باہر کرے۔فضل الرحمن کو کشمیر کمیٹی کے چیئرمین کے عہدے سے ہٹایا جائے۔ حکومت محرم میں سیکیورٹی کے فول پروف انتظامات کرے۔ کرپشن کے خلاف چلنے والی ہر تحریک میں حصہ لیں گے۔ 30اہلسنّت جماعتوں کا مشترکہ اجلاس سنی اتحاد کونسل کی دعوت پر جامعہ رضویہ میں منعقد ہوا۔ اجلاس کی صدارت سنی اتحاد کونسل پاکستان کے چیئرمین صاحبزادہ حامد رضا نے کی جبکہ اجلاس کے شرکاء میں جماعت اہلسنّت پنجاب کے امیر مفتی محمد اقبال چشتی، انجمن طلباء اسلام کے مرکزی صدر سید بو علی شاہ، نیشنل مشائخ کونسل کے صدر خواجہ غلام قطب الدین فریدی، سنی اتحاد کونسل کے رہنما میاں فہیم اختر، مرکزی جے یوپی کے سیکرٹری جنرل بیرسٹر صاحبزادہ حسین رضا، نظام مصطفی پارٹی کے رہنما مولانا سید آفتاب عظیم بخاری، سنی تحریک کے رہنما مولانا محمد صدیق قادری، تنظیم المساجد پاکستان کے مفتی محمد حسیب قادری، پاکستان فلاح پارٹی کے صدر محمد ظہور چشتی، مصطفائی تحریک کے ممتاز ربانی، علماء بورڈ کے پیر حامد سرفراز، جانثاران ختم نبوت کے مولانا سیف سیالوی، تحریک فروغ اسلام کے مفتی مشتاق نوری، تحفظ ناموس رسالت محاذ کے جنر ل سیکرٹری مولانا محمد علی نقشبندی، تنظیم اتحاد امت کے چیئرمین محمد ضیاء الحق نقشبندی، سنی یوتھ ونگ کے صدر صاحبزادہ حسن رضا، انجمن خدام الاولیاء کے صدر صاحبزادہ محمد احمد قادری، تحریک مشائخ اہلسنّت کے سربراہ پیر میاں غلام مصطفی،مرکزی مجلس چشتیہ کے سربراہ پیر طارق ولی چشتی، تحریک نفاذ فقہ حنفیہ کے علامہ یعقوب فریدی، محاذ اسلامی کے مولانا تنویر الاسلام نقشبندی، انجمن طلباء مدارس عربیہ کے مولانا فہد الاسلام اور دیگر شامل تھے۔ اجلاس سے صدارتی خطاب کرتے ہوئے سنی اتحاد کونسل کے چیئرمین صاحبزادہ حامد رضا نے کہا کہ بھارت کے خلاف جہاد کا وقت آیا تو اہلسنّت سب سے آگے ہونگے۔ بھارت کا سرجیکل ڈرامہ فلاپ ہو گیا ہے۔ محرم کے بعد حکومت کے خلاف بڑا محاذلگے گا۔ دہشتگردی کا مرکز پاکستان نہیں بھارت اور افغانستان ہے۔ مودی کان کھول کر سن لے پوری قوم دفاع وطن کیلئے اپنی بہادرفوج کی پشت پر کھڑی ہے۔ بھارتی جارحیت کا مقابلہ کرنے کیلئے سیاسی و عسکری قیادت متحد ہے۔ پاک فوج کے دندان شکن جواب نے مودی کے اوسان خطا کردیئے ہیں۔ مشترکہ اجلاس کی منظور کی گئی قراردادوں میں مطالبہ کیا گیا ہے کہ حکومت بھارت کے خلاف جہاد کا اعلان کرے۔ بھارتی فلموں اور ڈراموں کی نمائش پر پابندی لگائی جائے ۔ سانحہ ماڈل ٹاؤ ن کے شہیدوں کے ورثاء کو انصاف فراہم کیا جائے۔ صاحبزادہ سید حامد سعید کاظمی کی غیر منصفانہ سزا ختم کرکے انہیں رہا کیا جائے۔ حکومت نفاذ شریعت کا آئینی تقاضا پورا کرے۔ وزیر اعظم قانون ناموس رسالت میں کسی بھی قسم کی کو ئی تبدیلی نہ کرنے کا دو ٹوک اعلان کریں۔ قادیانیوں کی اسلام دشمن سازشوں کا سدباب کیا جائے ۔پانامہ لیکس کی شفاف تحقیقات کروائی جائیں۔ حکومت بھارتی آبی دہشتگردی روکنے کیلئے اقدامات کرے۔ مساجد اور مدارس کے خلاف سازشیں بند کی جائیں۔ حکومت مظلوم کشمیریوں کی سفارتی، اخلاقی اور سیاسی مدد کیلئے بھر پور اقدامات کرے اور بھارت کے خلاف عالمی سطح پر سفارتی مہم چلائے۔ اجلاس میں کنٹرول لائن پر بھارتی فائرنگ سے شہید ہونیوالے جمعہ خان اور امتیاز احمد کیلئے فاتحہ خوانی بھی کی گئی۔

موضوعات:اہلسنّت جماعتوں