اسلام آباد(مانیٹرنگ ڈیسک )پاکستان نے مقبوضہ کشمیر میں بھارتی مظالم کی مذمت کرتے ہوئے کہا ہے کہ طاقت کے بے جا استعمال سے کشمیریوں کے حق خودارادیت کو کچلا نہیں جاسکتا اور عوام کا رد عمل بھارتی موقف کو مسترد کرتا ہے، جموں وکشمیرکے تنازع سے چشم پوشی نہیں کی جاسکتی، آزادانہ، منصفانہ اورغیرجانبدارانہ استصواب رائے کشمیریوں کاحق ہے۔ دفتر خارجہ کے ترجمان نفیس ذکریا نے بھارتی بیانات پرردعمل کااظہار کرتے ہوئے کہا کہ عالمی برادری نے کشمیریوں سے کیاگیاوعدہ پورانہیں کیاتاہم پاکستان جموں وکشمیرکے عوام کیساتھ کھڑ ا ہے۔
ترجمان دفترخارجہ نفیس ذکریا نے کہا ہے کہ وزیراعظم نواز شریف نے اقوام متحدہ کی جنرل اسمبلی میں کشمیریوں کی آواز بھرپور انداز سے بلند کی جو کشمیریوں کے جذبات کا عکاس ہے جس کے جواب میں بھارت نے وزیراعظم کے بیان پرتنقید کرنے کا انتخاب کیا تاہم کسی قسم کی تنقید تاریخی حقائق کو تبدیل نہیں کرسکتی، بھارت کی تنقید کا پاکستان جواب دینے کا حق رکھتا ہے اور پاکستان کشمیری عوام کے شانہ بشانہ کھڑا ہے۔ انہوں نے کہا کہ سات دہائیاں گزرنے کے باوجود کشمیری عوام کا جذبہ حریت کم نہیں ہوا اور مقبوضہ کشمیر کے عوام کا رد عمل بھارتی موقف کو مسترد کرتا ہے جب کہ عالمی برادری نے کشمیری عوام کو حق خود ارادیت دینے کا وعدہ کیا لیکن اسے پورا نہیں کیا۔ ترجمان دفتر خارجہ کا کہنا تھا کہ برہان وانی کے قتل کیخلاف مقبوضہ کشمیرمیں احتجاج شروع ہوا اور پرامن احتجاج کوطاقت کے ذریعے کچلنے کی کوشش کی گئی، سینکڑوں بے گناہ کشمیریوں کو نابینا اور ہزاروں کوشدید زخمی کیا گیا، طاقت کیاستعمال کے باوجود کشمیریوں کے حوصلے پست نہ ہوئے۔