لاہور (این این آئی )پاکستان تحریک انصاف کے رائیونڈ کی طرف مارچ کی تاریخ کے اعلان کے بعد مسلم لیگ (ن) کی اعلیٰ قیادت نے حکومتی پالیسی پر غور کے لئے مشاورتی عمل شروع کر دیا ۔ ذرائع کے حوالے سے بتایا گیا ہے کہ گزشتہ روز وزیر اعلیٰ پنجاب محمد شہباز شریف سے وفاقی وزیر داخلہ چوہدری نثار علی خاں نے لاہور میں تفصیلی ملاقات کی جس میں نیشنل ایکشن پلان اور سکیورٹی امور پر تبادلہ خیال کیا گیا ۔ خصوصاً تحریک انصاف کے رائیونڈ مارچ سے متعلق حکومتی پالیسی کے معاملات زیر غور آئے ۔ قبل ازیں وزیراعلیٰ شہباز شریف سے وفاقی وزیر ریلویز خواجہ سعد رفیق نے بھی ملاقات کی اور اس دوران بھی رائے مارچ کے حوالے سے حکومتی حکمت عملی پر غور کیا گیا ۔ اس موقع پر شہباز شریف کا کہنا تھا کہ عوام نے دھرنا سیاست کرنے والوں کا ایک بار پھر دھڑن تختہ کر دیا ہے۔ پاکستان کے باشعور عوام جانتے ہیں کہ ان کی بے لوث خدمت کون کر رہا ہے اور انتشار کی سیاست کون؟ انہوں نے کہا کہ خدمت، دیانت اور شفافیت کے سامنے الزام تراشی اور جھوٹ کی سیاست کی کوئی حیثیت نہیں۔ جبکہ وفاقی وزیر خواجہ سعد رفیق نے اس موقع پر بات چیت کرتے ہوئے کہا کہ چیچہ وطنی میں مخالفین کی نشست پر مسلم لیگ (ن) کی جیت اس بات کا ثبوت ہے کہ عوام پارٹی قیادت سے والہانہ محبت کرتے ہیں۔