اسلام آباد(آئی این پی) عوامی مسلم لیگ کے سربراہ شیخ رشید احمد کی شریف خاندان کے رائے ونڈ میں رہائش گاہ کے باہر ہونے والے احتجاج میں تحریک انصاف کے سربراہ عمران خان اور عوامی تحریک کے سربراہ علامہ طاہر القادری کو اکٹھا کرنے کی کوششیں ناکام ہو گئیں۔ واضح رہے کہ عوامی مسلم لیگ کے سربراہ شیخ رشیدنے 2014ء کے اسلام آباد دھرنے میں بھی سخت محنت اور کوششوں کے بعد عمران خان اور طاہر القادری کو اکٹھا کیا تھا اور اب ایک بار پھر وہ کوشاں تھے کہ تحریک انصاف اور عوامی تحریک مل کر رائے ونڈ میں پانامہ لیکس کے خلاف احتجاج کریں او راس کے لئے انہوں نے عمران خان اور طاہر القادری سے متعدد رابطے بھی کئے تاہم شیخ رشید کی کوششیں ہفتہ کو اس وقت ناکامی سے دوچار ہو گئیں جب طاہر القادری نے رائے ونڈ احتجاج میں شرکت نہ کرنے کا اعلان کر دیا۔ قبل ازیں (ق) لیگ کے صدر چوہدری شجاعت حسین ‘ اے این پی ‘ پی پی پی اور متعدد دیگر جماعتیں بھی عمران خان کو رائے ونڈ میں احتجاج نہ کرنے کا مشورہ دے چکی ہیں۔