اسلام آباد(مانیٹرنگ ڈیسک)پاکستان تحریکِ انصاف ( پی ٹی آئی) کے رہنما شوکت یوسف زئی کا کہنا ہے کہ پنجاب حکومت کی جانب سے تحریک انصاف کی ریلی کے لیے سیکیورٹی الرٹ جاری کرنے کا مقصد محض احتساب تحریک کو ناکام بنانے کی کوشش تھی، حکومت یہ کام کرکے تحریک انصاف کو ناکام بنانا چاہتی تھی۔نجی ٹی وی پروگرام میں گفتگو کرتے ہوئے شوکت یوسف زئی کا کہنا تھا کہ حکومت کی خواہش تھی کہ کسی طرح سے تحریک انصاف کے مارچ میں کم سے کم لوگ شرکت کریں۔انھوں نے کہا کہ حکومت نے جگہ جگہ کنٹینرز لگا کر روڈ بند کیے، لیکن اس کے باوجود بھی لوگ سڑکوں پر نکل آئے، اتنی رکاوٹوں کے بعد بھی عوام کا باہر آنا اس بات کو ثابت کرتا ہے کہ لوگ اب حکومت پر اعتبار نہیں کرتے۔مسلم لیگ (ن) کی جو پنجاب میں ساکھ تھی اْسے خود انھوں نے ختم کردیا۔پاناما لیکس پر بات کرتے ہوئے شوکت یوسف زئی کا کہنا تھا کہ جتنا حکومت اس معاملے میں پیچھے جائے گی یہ چیز آگے آئے گی، کیونکہ ہم اس کو چھوڑ نہیں سکتے۔انھوں نے کہا کہ 2018 کے عام انتخابات تک تحریکِ انصاف پاناما جیسے بڑے مسئلے کو زندہ رکھے گی۔واضح رہے کہ گذشتہ روز ایف بی آر نے پاناما لیکس میں سامنے آنے والے افراد کو آمدنی کی تفصیلات جمع کروانے کے نوٹس جاری کیے تھے۔

موضوعات:تحریک احتساب