کراچی(این این آئی)عوامی مسلم لیگ کے سربراہ شیخ رشید نے کہاہے کہ نواز شریف ہر کیس سے بچ سکتا ہے مگر سانحہ ماڈل تاؤن کے قتل عام اور پانامہ لیکس سے نہیں بچ سکتا اب حکمرانوں کو ظلم اور کرپشن کا حساب دینا ہو گا ،وقت قریب ہے حکمران سانحہ ماڈل تاؤن کے قتل عام میں پھانسی کے پھندے پر چڑھیں گے۔پاکستان کی تمام اپوزیشن جماعتوں کو اکٹھا کرنا چاہتا ہوں اگر اس وقت ڈاکٹر محمد طاہر القادری اور عمران خان اکٹھے ہو جائیں تو ایک دن میں ہی گو نواز گو ہو جائے گا۔ان دونوں لیڈروں کو ایک ہونا پڑے گا ۔وہ اتوارکو پاکستان عوامی تحریک پاکستان کی جانب سے سانحہ ماڈل ٹاؤن کے خلاف اتوار کو کراچی میں مزار قائد سے تبت سینٹر تک نکالی گئی ریلی سے خطاب کر رہے تھے ۔ریلی میں سیاسی،سماجی،مذہبی،انسانی حقوق کی تنظیموں کے نمائندوں سمیت عوام کی کثیر تعداد نے شرکت کی ۔ ریلی سے پاکستان عوسامی تحریک کے سربراہ ڈاکٹرطاہرالقادری ، پی اے ٹی کے مرکزی نائب صدر ڈاکٹر ایس ایم ضمیر، کراچی کی صدر سید علی اوسط، جنرل سیکرٹری راؤ کامران ودیگر نے بھی خطاب کیا۔ شیخ رشید نے کہاکہ شہدائے ماڈل تاؤن کا خون رنگ لائے گا آئندہ کوئی ظالم ظلم نہیں کرے گا۔مولانا فضل الرحمان کی نظر اسلام پر نہیں اسلام آباد پر ہے ۔نواز شریف کو پاکستان سے کوئی سروکار نہیں نواز شریف نے پورا پاکستان نہیں دیکھا مگر اپنے بزنس کیلئے پوری دنیا گھوم چکا ہے ۔انھوں نے کہا قوم کو اپنی اور اپنی نسلوں کی بقاء کیلئے نکلنا ہو گا۔ شیخ رشید احمد نے کہا کہ پانامہ لیکس کے معاملے پر حکمرانوں کے خلاف احتجاج کے لیے اپوزیشن جماعتوں کو متحد ہونے کی ضرورت ہے ،حکمرانوں کے خلاف گھیرا تنگ ہورہا ہے ،آئندہ آنے والا مہینہ سیایس طور پر بھاری ہوگا۔ انھوں نے کہا کہ میں یقین سے کہتا ہو ں کہ اگر تمام اپوزیشن جماعتوں نے حکومت کے خلاف مشترکہ تحریک چلائی تو جلد شریف برادران اقتدار سے رخصت ہوجائیں گے ،عوام کو اب گھروں سے نکلنا ہوگا ،ہم نے احتجا ج کی بنیاد رکھ دی ہے جو احتجاجی تحریک نواز شریف کے رخصت ہونے تک جاری رہے گی۔