انقرہ (مانیٹرنگ ڈیسک) ترک صدر رجب طیب ایردوآن نے ایک ہزار سے زیادہ نجی اسکولوں کو بند کرنے کا حکم دیا ہے اور ناکام فوجی بغاوت سے تعلق رکھنے والے مشتبہ افراد کو کسی فرد الزام کے بغیر زیر حراست رکھنے کی مدت میں اضافہ کردیا ہے۔ترکی کی سرکاری خبررساں ایجنسی اناطولو کے مطابق صدر ایردوآن کے دستخطوں سے ہفتے کے روز جاری کردہ اس حکم کے تحت حکومت کو گولن تحریک سے مشتبہ تعلق کے الزام میں 1043 نجی اسکولوں ،1229 خیراتی اداروں اور فاؤنڈیشنوں،19 ٹریڈ یونینوں،15 جامعات اور 35 میڈیکل اداروں کو بند کرنے کا اختیار حاصل ہوگیا ہے۔صدر ایردوآن نے مشتبہ افراد کو تفتیش کی غرض سے زیادہ سے زیادہ 30روز تک زیر حراست رکھنے کی بھی منظوری دی ہے۔اس سے پہلے مشتبہ افراد کو زیادہ سے زیادہ 4 روز تک زیر حراست رکھا جاسکتا تھا۔اس مدت میں توسیع کا مقصد ناکامی فوجی بغاوت میں ملوّث افراد کے خلاف تفتیش کے دائرہ کار کو وسیع کرنا ہے۔پارلیمان میں اب بھی اس حکم نامے کی منظوری ضروری ہے۔تاہم اب اس کے لیے صرف سادہ اکثریت درکار ہوگی اور پارلیمان میں حکمراں انصاف اور ترقی پارٹی (آق) کو سادہ اکثریت حاصل ہے۔