اسلام آباد (آئی این پی) وزیراعظم نواز شریف8جولائی بروز جمعہ وطن واپس آئیں گے، ان کے استقبال کی تیاریاں مکمل کرلی گئی ہیں، وزیراعلیٰ پنجاب شہباز شریف، مریم نواز، خاندان کے دیگر افراد اور اہم وزراء ان کا استقبال کریں گے، وزیراعظم کا(آج) منگل کو طبی معائنہ ہو گا، جس میں توقع ہے کہ ڈاکٹرز انہیں کلیئرنس سرٹیفکیٹ دے دیں گے۔ تفصیلات کے مطابق وزیراعظم نواز شریف کا (آج) منگل کو طبی معائنہ ہو گا، جس دوران اس بات کا قوی امکان ہے کہ ڈاکٹر انہیں مکمل صحتیابی کا سرٹیفکیٹ دے کر وطن واپسی کی اجازت دیں گے۔ ذرائع کے مطابق وزیراعظم لاہور ایئر پورٹ پر پہنچیں گے جہاں وزیراعلیٰ پنجاب شہباز شریف، وزیراعظم کی صاحبزادی مریم نواز شریف، خاندان کے دیگر افراد اور اہم وفاقی وزراء، وزیر اطلاعات و نشریات پرویز رشید، وزیر خزانہ اسحاق ڈار، وزیر دفاع خواجہ محمد آصف اور دیگر ان کا استقبال کریں گے، اس سلسلے میں تیاریاں مکمل کی جا چکی ہیں، تاہم جماعتی سطح پر کارکنان کو استقبال کیلئے ایئرپورٹ پر آنے سے منع کیا گیا ہے، اس لئے یہ کہا جا رہا ہے کہ کارکنان استقبال کیلئے موجود نہیں ہوں گے۔ ذرائع کے مطابق وزیراعظم نواز شریف لاہور پہنچنے کے بعد رائے ونڈ جائیں گے جہاں وہ اپنی والدہ سے ملیں گے، وزیراعظم چنددن رائے ونڈ گزارنے کے بعد اسلام آباد پہنچیں گے جہاں وہ پیر کے روز سے حکومتی امور باقاعدہ طور پر نمٹانا شروع کر دیں گے۔ ذرائع کے مطابق وزیراعظم وطن واپسی کے دو ہفتے قیام کے بعد سعودی عرب جائیں گے، جہاں وہ عمرہ کی سعادت حاصل کریں گے۔