لاہور( این این آئی)شوال کا چاند دیکھنے کیلئے مرکزی رویت ہلال کمیٹی کا اجلاس آج( منگل) کو لاہور میں منعقد ہوگا ۔ رویت ہلال کمیٹی کا اجلاس 15سال کے طویل وقفے کے بعد لاہور میں منعقد ہو رہا ہے ۔جبکہ اسی روز زونل کمیٹیوں کے اجلاس بھی منعقد ہوں گے جو چاند کے نظر آنے یا نہ آنے بارے شہادت دیں گے ۔ ماہرین فلکیات کا کہنا ہے کہ ملک کے مختلف حصوں کی طرح لاہور اور پنجاب کے دیگر علاقوں میں بھی شوال المکرم کا چاند منگل کو نظر آنے کے قوی امکانات ہیں ۔ ماہرین فلکیات کے مطابق شوال المکرم 1437ہجری کا چاند کل منگل دوپہر 4بج کرایک منٹ پرپیدا ہوگا، 5جولائی کو لاہورمیں سورج 7بج کر13منٹ پرغروب ہوگا، سورج اور چاند کے غروب ہونے کا درمیانی فرق 39منٹ ہوگا۔چاند نظرآنے کیلئے چاند کی کم ازکم عمر 19گھنٹے سے زائد ہونی چاہیے اور غروب آفتاب کے وقت چاند کی عمر 27گھنٹے 40منٹ ہوجائے گی۔ لاہور میں چاند 6.37ڈگری پر ہوگا، مطلع صاف ہونے کی صورت میں لاہور کے عوام چاند آسانی سے دیکھ سکیں گے۔ واضح رہے کہ اس مرتبہ مرکزی رویت ہلال کمیٹی کا اجلاس لاہور میں منعقد ہورہاہے۔ اس بات کا بھی غالب امکان ہے کہ اس مرتبہ سعودی عرب سمیت خلیجی ممالک اور پاکستان میں ایک ہی روز عید الفطر منائی جائے۔