نیویارک (این این آئی) سابق وزیراعظم شوکت عزیز نے کہا ہے کہ مسئلہ کشمیر پر بھارت سے تمام معاملات طے پا گئے تھے لیکن جس جماعت سے مذاکرات طے پائے اس کی حکومت ہی نہ رہی۔نیویارک میں ایشیا سوسائٹی کی نشست سے خطاب کرتے ہوئے شوکت عزیز نے کہا کہ موجودہ حکومت بہت پیچیدہ صورتحال سے نمٹنے کی کوشش کر رہی ہے، حکومت کو مسائل سے نمٹنے کا موقع ملنا چاہئے ٗ پاک چین اقتصادی راہداری منصوبے سے پاکستان کے لیے ترقی کی نئی راہیں کھلیں گی ٗچین کی سرمایہ کاری پر کسی خدشات میں پڑنے کی ضرورت نہیں سابق وزیر اعظم نے کہاکہ مسئلہ کشمیر پر بھارت سے تمام معاملات طے پا گئے تھے تاہم ہماری بدقسمتی ہے کہ جس بھارتی جماعت سے بات ہوئی وہ اقتدار میں ہی نہ رہی، کشمیر کے معاملے پر بھارت کے ساتھ پس پردہ رابطوں میں برطانیہ نے اہم کردار ادا کیا تھا۔ انہوں نے کہاکہ پاکستان اور بھارت کو چاہیے کہ آپس میں تجارت کو فروغ دیں کیونکہ تجارت ہی ملکوں میں ہم آہنگی، رابطوں اور امن کا ذریعہ بنتی ہے۔شوکت عزیز نے بھارت اور عالمی طاقتوں سمیت تمام ملکوں سے اچھے تعلقات کو ضروری قرار دیا پاکستان کو درپیش خارجہ پالیسی کے چیلنجز سے متعلق سوال پر شوکت عزیز نے کہا کہ موجودہ حکومت پیچیدہ حالات سے نمٹنے کی بھرپور کوشش کر رہی ہے حکومت کو مسائل سے نمٹنے کا موقع دیا جاناچاہیے ۔پاکستان واپس نہ آنے سے متعلق سوال پر شوکت عزیز نے کہا کہ وہ کہاں جاتے ہیں اور کہاں نہیں یہ ان کا ذاتی معاملہ ہے جس کا احترام کیا جاناچاہیے ۔