کراچی (مانیٹرنگ ڈیسک)کراچی انسداد دہشتگردی کی عدالت نے کراچی کے نامزد میئر وسیم اختر کو بیرون ملک جانے کیلئے 20 روز کی اجازت دے دی ہے ۔پیر کو انسداد دہشتگردی کی عدالت میں وسیم اختر کی جانب سے درخواست دی گئی تھی کہ انہیں کچھ نجی مصروفیات کے باعث بیرون ملک جانا ہے ، عدالت سے استدعا ہے کہ انہیں باہر جانے کی اجازت دی جائے، عدالت نے وسیم اختر کو 20 روز کیلئے بیرون ملک جانے کی اجازت دے دی۔بعد ازاں میڈیا سے گفتگو کرتے ہوئے وسیم اختر نے کہا کہ میں واپس آکر اپنے کیخلاف قائم مقدمات کا سامنا کروں گا، ہم پر جھوٹے مقدمات بنائے گئے ہیں، حکومت بلدیاتی معاملات میں سنجیدہ نظر نہیں آتی، شہر بھر میں گٹر ابل رہے ہیں ، جگہ جگہ کچرے کے ڈھیر لگے ہیں، حکومت کو نظر نہیں آتا، ان کا کہنا تھا کہ چیف جسٹس سندھ ہائیکورٹ کے بیٹے اویس علی شاہ کا اغوا ہونا اور امجد صابری کے قتل پر ہمیں افسوس ہے ، حکومت سے مطالبہ ہے کہ اویس شاہ کو جلد بازیاب کرائیں اور امجد صابری کے قاتلوں کو گرفتار کر کے کیفرکردار تک پہنچائیں۔