اسلام آباد (این این آئی) سینٹ نے عظیم باکسر محمد علی کی خدمات کو خراج عقیدت پیش کرنے کی قرارداد اتفاق رائے سے منظور کرلی۔ پیر کو اجلاس میں قائد ایوان سینیٹر راجہ ظفر الحق نے قرارداد پیش کرتے ہوئے کہا کہ سینیٹ آف پاکستان تین مرتبہ ہیوی ویٹ باکسنگ چمپئن اور انسانی حقوق کے ممتاز کارکن محمد علی کو خراج عقیدت پیش کرتی ہے جنہوں نے باکسنگ کے میدان کے اندر اور باہر ایک رول ماڈل کی حیثیت سے بامقصد زندگی گذاری۔ انہوں نے کہا کہ ان کی عظیم کامیابی یہ تھی کہ وہ غیر متزلزل اعتقاد کے ساتھ غیر منصفانہ ویت نام کی جنگ کے خلاف کھڑے ہوئے۔ قرارداد میں دعا کی گئی کہ اﷲ تعالیٰ محمد علی مرحوم کو اپنے جوار رحمت میں جگہ دے اور لواحقین کو صبر جمیل عطا کرے۔ قرارداد تمام جماعتوں کے اتفاق رائے سے پیش کی گئی۔ بعد ازاں قائد ایوان سینیٹر راجہ ظفر الحق نے محمد علی مرحوم کے لئے فاتحہ خوانی کرائی۔ سینیٹر مشاہد حسین سید نے بھی محمد علی کو خراج عقیدت پیش کیا اور کہا کہ وہ سب کے ہیرو تھے۔