مظفر آباد (این این آئی)آزاد جموں و کشمیر کے الیکشن کمیشن نے آزاد کشمیر میں عام انتخابات کے شیڈول کا اعلان کردیا ہے جس کے مطابق آزاد جموں و کشمیر قانون ساز اسمبلی کے الیکشن 21 جولائی کو ہوں گے۔آزاد کشمیر کے چیف الیکشن کمشنر جسٹس مصطفی مغل نے میڈیا بتایا کہ کاغذات نامزدگی 16 جون شام 4 بجے تک جمع کرائے جا سکیں گے۔ کاغذات نامزدگی کی جانچ پڑتال 17 جون صبح 8 بجے سے ہو گی، ریٹرننگ آفیسرز امیدواروں کی فہرست 18 جون کو جاری کریں گے کاغذات نامزدگی کے منظور یا مسترد کیے جانے کیخلاف اپیلیں 22 جون دوپہر 2 بجے تک دائر کی جا سکیں گی۔ چیف الیکشن کمشنر اپیلوں کی سماعت 23 اور 24 جون کو صبح 9 بجے سے سہ پہر 4بجے تک کریں گے۔ اپیلوں پر فیصلے 25 اور 26 جون کو جاری کئے جائیں گے جبکہ 27 جون کو دوپہر 2 بجے تک کاغذات نامزدگی واپس لئے جاسکیں گے اور 28 جون کو امیدواروں کی فہرستیں آویزاں کردی جائیں گی جبکہ امیدواروں کو انتخابی نشانات 29 جون کو الاٹ کئے جائیں گے جس کے فوری بعد انتخابی نشانات کے ساتھ امیدواروں کی حتمی فہرستیں جاری کر دی جائیں گی۔ انتخابات کیلئے پولنگ 21 جولائی کو صبح 8 بجے سے شام 5 بجے تک ہو گی۔