برلن(این این آئی)بغیر چیکنگ کے جرمنی کولون بون ایئر پورٹ کی سکیورٹی لائن عبور کرنے والے شخص کو گرفتار کر لیا گیا۔ اِس صورت حال کے بعد سکیورٹی ایمرجنسی پیدا ہونے پر ہوائی اڈے کو بند کر دیا گیا تھاتاہم بعد میں اسے بحال کردیاگیا،میڈیارپورٹس کے مطابق جر منی کی وفاقی پولیس نے سکیورٹی ضوابط کی خلاف ورزی پر ایک باسٹھ سالہ ہسپانوی شخص کو گرفتار کرنے کا بتایا ہے۔ اِس گرفتاری سے قبل کولون بون کے بین الاقوامی ہوائی اڈے کی بیرون ملک پروازوں کے لیے عارضی طور بند کر دیا گیا تھا۔پولیس کے مطابق ایک شخص کے بغیر چیکنگ لابی میں داخل ہونے پر ایمرجنسی کی کیفیت پیدا ہو گئی تھی۔ چھان بین اور تلاش کے بعد پولیس نے جس ہسپانوی کو گرفتار کیا ہے وہ فارو جزیرے کے لیے روانہ ہونے والے ہوائی جہاز تک جلد از جلد پہنچنا چاہتا تھا۔ یہ واقعہ ایئر پورٹ کے ٹرمینل ایک کے ڈیپارچر لاؤنچ پر رونما ہوا۔سکیورٹی ضوابط کی خلاف ورزی کے بعد فوری طور پر ہوائی جہاز کی سکیورٹی متحرک ہو گئی۔ ٹرمینل ون پر پرواز کے لیے تیار پانچ ہوائی جہازوں کو فوری طور پر پارکنگ پوزیشن سے ہٹا دیا گیا تھا۔سکیورٹی اہلکاروں کو سکون اْس وقت حاصل ہوا جب فارو جانے والے شخص کو گرفت میں لے لیا گیا۔ اس کارروائی کے دوران ہوائی اڈہ تقریباً سوا گھنٹے تک بند رہا۔ حراست میں لیے گئے شخص سے پوچھ گچھ جاری ہے۔ ایئر پورٹ حکام نے چند پروازوں کی تاخیر سے روانگی کی تصدیق کر دی ہے۔