مظفرآباد(این این آئی)آزادکشمیر کے سابق وزیراعظم اور آل جموں و کشمیر مسلم کانفرنس کے صدر سردار عتیق احمد خان نے کہا ہے کہ مسلم کانفرنس پی ٹی آئی اتحاد آزادکشمیر کی سب سے بڑی زمینی حقیقت بن کر ابھرے گا۔ ہم آزادکشمیر کے عوام کو وفاقی وزراء کے ’’لکی ایرانی سرکس‘‘ کے رحم و کرم پر نہیں چھوڑ سکتے، ان خیالات کا اظہار انہوں نے گزشتہ روز مسلم کانفرنس مظفرآباد ڈویژن کے سینئر نائب صدر خواجہ شفیق احمد کی رہائش گاہ پراستقبالیہ تقریب سے خطاب کرتے ہوئے کیا۔ انہوں نے کہا کہ وہ زمانے گزر گئے جب وفاقی وزراء کی آمد عوام کی رائے پر اثر انداز ہوتے تھے اب آزادکشمیر کے عوام باشعور ہیں اور وہ دھونس دھمکی والوں کو گھروں کی راہ دکھائیں گے۔ انہوں نے کہاکہ مسلم کانفرنس کے کارکن نظم وضبط کا مظاہرہ کریں اور قیادت کے فیصلوں پر اعتماد کا اظہار کرتے ہوئے سیاسی تبدیلی میں اہم کردار ادا کریں۔ انہوں نے کہا کہ آزادکشمیر کے عوام تبدیلی کے لئے ہمارے اتحاد کی طرف دیکھنے لگے ہیں، ہم عوام کو کبھی مایوس نہیں کرینگے، پی ٹی آئی اور مسلم کانفرنس کا اتحاد کرپشن ، دھاندلی کو روکنے کیلئے بنایا گیا ہے۔ یہ اتحاد ثابت کر دیگا کہ مسلم کانفرنس اور پی ٹی آئی ہی آزادکشمیر کی حقیقی معنوں میں سیاسی جماعتیں ہیں۔ اس موقع پر ان کے ہمراہ سابق وزیر حکومت پیر سید غلام مرتضی گیلانی، راجہ ثاقب مجید، شمیم علی ملک ، ممبر کشمیر کونسل مختیار عباسی ، میر عتیق الرحمن، عنصر پیرزادہ، سمعیہ ساجد، سجاد انور عباسی، سید یاسر نقوی ، ہارون آزاد، فیضان مغل، راجہ احسان حیدر، عبدالمجید مغل ، راجہ ولید عبداللہ ، سجاد سلہریا و دیگر کارکنوں کی بڑی تعداد موجود تھی۔ اس سے قبل جب وہ حبیب منزل پہنچے تو سابق وزیراعظم آزادکشمیر کا شاندار استقبال کیا گیا۔