مٹھی (آئی این پی )تھرپارکر میں قحط سالی و غذائی قلت کا شکار مزید 5بچے ہفتے کو دم توڑ گئے۔ رواں سال ہلاکتوں کی تعداد466 سے زائد ہو گئی۔ تھر پاکر میں مزید پانچ بچوں کی ہلاکتوں کے واقعات پیش آئے۔چھاچھرو تحصیل کے گاؤں شادی رند میں تین ماہ کا علی رضا،ایک سالہ امجد،دو سالہ اشرف،سول اسپتال مٹھی میں رشید کا چار روزہ بچہ اور اور عمر نہڑی کی بچی شامل ہیں۔طبی ماہرین کے مطابق تھر میں غذائی قلت پر کام نہ ہونے کے باعث حاملہ خواتیں کمزور بچوں کو جنم دیتی ہیں۔جس کے باعث ہلاکتوں کا سلسلہ رکنے میں نہیں آ رہا ہے۔گذشتہ چار سال کے مقابلے میں رواں سال ہلاکتوں میں بہت زیادہ اضافہ ہوا ہے۔جس کا سبب چار سالہ قحط کا تسلسل اور بچوں کی اموات کے اصل اسباب پر کام نہ کرنا ہے۔اسلام کوٹ اسپتال میں گزشتہ روز ایک بھی لیڈی ڈاکٹر نہ ہونے کے باعث حاملہ خواتین کو مٹھی ریفر کیا جا رہا تھا۔اسپتال انتظامیہ کے مطابق صرف 2لیڈی ڈاکٹر ہیں جو 24 گھنٹے ڈیوٹی نہیں دے سکتی ہیں۔