کوئٹہ(این این آئی)پاک سر زمین پارٹی کے رہنما مصطفی کمال نے کہاہے کہ قومی پرچم کو ماننے والے ہرشخص کو گلے سے لگائیں گے ٗ پارٹی کا جھنڈا فساد کی جڑ ہوتا ہے اس لیے پاکستان کے جھنڈے کونصب العین بنایا۔ہفتہ کو کوئٹہ پریس کلب میں پریس کانفرنس کے دوران پاک سر زمین پارٹی کے رہنما مصطفی کمال نے کہا کہ بلوچستان میں ہماری جماعت کو بھرپور پذیرائی ملی، سندھ سے باہر پہلی بار باقاعدہ کام شروع کررہے ہیں، ہم لوگوں کو توڑنے نہیں جوڑنے آئے ہیں، ہمیں ملک کو جوڑنا ہے۔ انہوں نے کہاکہ قومی پرچم کو ماننے والے ہرشخص کو گلے سے لگائیں گے ٗ پارٹی کا جھنڈا فساد کی جڑ ہوتا ہے اس لیے ہم نے پاکستان کے جھنڈے کو نصب العین بنایا، ہمیں موجودہ نظام کو تبدیل کرنا پڑے گا اور بنیادی سہولیات ہر قصبے، دیہات اور گاؤں میں فراہم کرنا ہوگا ترجیح ہے اور ہمارا فارمولہ ہے کہ بلوچستان سے اس کا آغاز ہونا چاہیے۔مصطفی کمال نے کہا کہ ہرزبان اوررنگ ونسل کے لوگ ہمارے ساتھ مل گئے ہیں، سیاسی اختلافات رکھنے چاہئیں مگردشمنی نہیں ہونی چاہیے، ہمیں اختلاف رائے کو دشمنی میں تبدیل نہیں کرنا چاہئے، عوام کے مسائل گھمبیرسے گھمبیر ہورہے ہیں، پاکستان کے عوام کوبنیادی سہولیات ملنی چاہئیں ٗ عوام کے مسائل کے حل کے لئے اختیارات نچلی سطح پرمنتقل کرنا ہوں گے۔اس سے قبل مصطفی کمال اور انیس قائمخانی کوئٹہ پہنچے تو پاک سرزمین پارٹی کے کارکنان نے ان کا شاندار استقبال کیا جس کے بعد انہوں نے جناح روڈ پر اپنی جماعت کے دفتر کا افتتاح کیا۔