لاہور ( این این آئی) پاکستان تحریک انصاف وومن ونگ لاہور رکی صدروبینہ جمیل کی طرف سے عابد شیر علی اور زعیم قادری کے خلاف تحریک انصاف کے کارکنوں کی ٹانگیں توڑنے کی دھمکیاں دینے اور نازیبا الفاظ استعمال کرنے پر تھانہ قلعہ گجر سنگھ میں دفعہ 506 کے تحت ایف آئی آر کے لئے درخواست جمع کروائی ہے ۔اس موقع پر ڈاکٹرزرقاتیمور سہروردی ،نیلوفر حبیب ،شہناز خان، رابعہ، ڈاکٹر شاہد صدیق خان، کاشف ، محمد مدنی اور شہباز بھی موجود تھے۔میڈیا کے نمائندوں سے گفتگو کرتے ہوئے رہنماؤں نے کہاکہ پولیس کی اعلیٰ قیادت سے امید ہے کہ وہ ہماری درخواست پر فور ی کاروائی عمل میں لائیں گے اور (ن) لیگ کے گلوؤں کو گرفتار کریں گے ، اگر ایسا نہ ہواتو پھر عدالتی راستہ اختیار کریں گے اور تحریک انصاف کے کارکنوں کو دھمکیاں دینے دینے والوں کیفرکردار تک پہنچاکر دم لیں گے ۔ انہوں نے کہاکہ اگر ہماری کسی طرف سے شنوائی نہ ہوئی تو رائے ونڈکا بھی رخ کریں گے اور جس میں جرات ہے وہ ہماری ٹانگیں توڑ کردکھائے ، تحریک انصاف کے جیالے اور بہادر کارکن ان گلوؤں کا ڈٹ کر مقابلہ کریں گے۔انہوں نے کہاکہ پانامہ لیکس میں نوازشریف کے خاندان کا نام آنے پر (ن) لیگ کے درباریوں کی نوکریاں خطرے میں پڑ گئی ہیں اوراپنا ذہنی توازن کھوبیٹھے ہیں،پاکستانی عوام عنقریب ملک میں انصاف ہوتا دیکھے گی اور کرپٹ ٹولے کا ملک سے ہمیشہ ہمیشہ کے لئے صفایا ہو جائے گا۔