لاہور ( این این آئی) قومی احتساب بیورو ( نیب ) نے ہاؤسنگ سوسائٹی میں سرکاری زمین کو شامل کرنے کے الزام میں تحریک انصاف کے رہنما عبدالعلیم خان کے خلاف تحقیقات شروع کر دیں۔ اسسٹنٹ ڈائریکٹر توصیف منور کی جانب سے مراسلے کے ذریئے پی ٹی آئی رہنما کو طلب کرلیا گیا۔ذرائع کے مطابق مسلم لیگ (ن)اور پیپلز پارٹی کے بعد نیب نے تحریک انصاف کے قائدین کے خلاف بھی انکوائری شروع کردی ہے۔ ذرائع کے مطابق تحریک انصاف کے مرکزی رہنما عبدالعلیم خان کے خلاف نیب نے انکوائری شروع کردی ہے۔پی ٹی آئی کے رہنما عبدالعلیم خان پر اپنی ملکیتی ہاؤسنگ سوسائٹی میں سرکاری زمین کو شامل کرنے کا الزام ہے۔ نیب ذرائع کے مطابق عبدالعلیم خان نے اپنی ملکیتی ریورایج سوسائٹی میں سرکاری اراضی شامل کی جس پر نیب کی جانب سے پی ٹی آئی رہنما کو مراسلے کے ذریعے طلب کر لیا گیا ہے ۔