اسلام آباد (نیوز ڈیسک) نئی سیاسی جماعت پاک سر زمین کے سربراہ اور سابق ناظم مصطفی کمال نے کہا ہے کہ کسی اسکرپٹ پر نہیں اپنی سوچ پر عمل کر رہے ہیں۔ اگر الطاف حسین ٹھیک ہوتے تو پارٹی میں برے لوگ بھی نہ ہوتے پورا سچ بولنا میرے لئے مشکل نہیں۔ ایک انٹرویو میں مصطفی کمال نے کہا کہ فی الحال پورا سچ بول کر کسی کی پریشانیوں میں اضافہ نہیں کر سکتا۔ ریاستی اداروں کے بل بوتے پر آنے والوں کا حشر دیکھ چکے ہیں۔ ہم کسی سے ڈکٹیشن نہیں لیں گے جس ادارے کا جو کام ہے اسے وہی کرنا چاہئے ایسے لوگ بھی ہیں جنہیں کسی صورت قبول نہیں کریں گے۔ جو پاکستان کو مانتا ہے وہ میرے لئے قابل نفرت نہیں ہو سکتا۔ بااختیار مقامی حکومتوں کے بغیر نئے صوبے بنانے کا کوئی فائدہ نہیں ہو گا۔ چھوٹے صوبوں کے تحفظات اور مسائل کو از سر نو سمجھنے کی کوشش کرنی چاہئے بڑے بڑے رہنماﺅں کا اقتدار چلا جاتا ہے لوگ انہیں یاد تک نہیں کرتے مگر میری خدمات کو یاد رکھا گیا۔ عمر فاروق سے لندن میں ملاقات ہوئی تھی مگر کوئی بات نہیں ہوئی۔ ایم کیو ایم سے ”را“ کے تعلقات کو منطقی انجام تک پہنچانا حکومت کی ذمہ داری ہے۔ ہماری جماعت مکمل طور پر جمہوری ہو گی۔ کراچی میں جاری ٹارگٹڈ آپریشن میں لوپ ہولز ہیں۔ متاثرہ خاندانوں کو قانونی مشاورت فراہم کریں گے۔ ایم کیو ایم کے کرپٹ لوگوں کو بچہ بچہ جانتا ہے۔ ایم کیو ایم 12 مئی کی واحد ذمہ دار نہیں کسی کو خوش کرنے کے لئے کچھ نہیں کہوں گا۔ ملازمت کے لئے ملک ریاض سے کبھی رابطہ نہیں کیا۔