لاہور (نیوز ڈیسک) ڈی آئی جی آپریشنز ڈاکٹر حیدر اشرف نے کہا ہے کہ آئندہ پولیس ناکوں پر موٹر سائیکل تھانوں میں بند نہیں کی جائے گی ،پولیس کے دوہسپتال بنار ہے ہیں ،ایک پولیس لائن اور دوسرے کے لئے موزوں جگہ کی تلاش جاری ہے ، پولیس اورعوام کے درمیان دوریاں ختم کرنے کیلئے تھانوں میں تعینات محرر کے اختیارات کم کر کے ایڈمن آفیسر کو منتقل کردیے گئے ہیں۔ حیدر اشرف نے نٹر ویو کے دوران کہا کہ آئندہ سے کسی ناکے پرکوئی موٹر سائیکل تھانے میں بند نہ کی جائے ۔ انہوں نے کہاکہ مجھے بخوبی احساس ہے کہ بعض ایمرجنسی یا کسی اور وجہ سے موٹر سائیکل کے کاغذات گھر بھول آتے ہیں ایسے لوگوں سے شناختی کارڈ اور دیگر تفصیل حاصل کرنے کے بعد موٹرسائیکل بند نہ کی جائے اگرکسی ناکے پر پولیس کے خلاف رشوت کی شکایت ملی تو متعلقہ اہلکاروں کے خلاف سخت محکمانہ کاروائی عمل میں لائی جائے گی۔ڈاکٹر حیدرا شرف نے مزید کہا کہ کاہل اور سست پولیس اہلکاروں کے لئے محکمے میں کوئی جگہ نہیں۔انہوں نے کہاکہ دہشت گردی کے خلاف جنگ میں شہریوں کو بھی اپنا فرض اداکرتے ہوئے ہمارا ساتھ دینا چاہیے اگر کوئی شخص مشکوک سرگرمیوں میں ملوث ہو یا کوئی لاوارث سامان نظرآئے تو عوام کو چاہیے کہ اپنے متعلقہ تھانے میں اطلاع کریں یا پھر ایمر جنسی 15پرکال کریں۔