لاہور (نیوز ڈیسک) صوبائی وزیر قانون و پارلیمانی امور رانا ثناءاللہ نے کہا ہے کہ خورشید شاہ کا گزشتہ روز کا لب و لہجہ انتہائی شرم ناک ، سازش اور شرارت پر مبنی تھا ، عمران خان کا چھ فروری کو احتجاج ترقی کے خلاف ہے، وہ صرف کنٹینر پرچڑھ سکتے ہیں انہیں دما دم مست قلندر کا کیا پتہ ہے ،وزیراعظم نوازشریف اور آرمی چیف جنرل راحیل شریف ترقی کے سفر میں ایک پیج پر ہیں۔گزشتہ روز پنجاب اسمبلی کے احاطہ میں میڈیا سے گفتگو کرتے ہوئے رانا ثنا اللہ کا کہنا تھا کہ پی آئی اے ملازمین کی ہڑتال کی وجہ سے یومیہ دس کروڑ سے زائد کا نقصان ہورہا ہے۔ ملازمین کے روز گار کے تحفظ کی یقین دہانی کے لئے پارلیمانی گارنٹی کے لئے تیار ہیں ، وزیراعظم نوازشریف واضح کہہ چکے ہیں کہ پی آئی کی نجکاری کی جا رہی نہ کسی ملازم کو نکالا جائے گا۔ اس کے باوجود پی آئی اے ملازمین بلیک میل کررہے ہیں۔ رانا ثنا اللہ نے کہا کہعمران خان سمیت کچھ قوتیں ملک کو آگے بڑھتے نہیں دیکھنا چاہتیں ۔ عمران خان کی کنٹینر اور دھرنا سیاست کی وجہ سے ملک ایک سال پیچھے چلا گیا تھا۔ اب عمران خان ایک بار پھر اورنج لائن منصوبے سمیت دیگر ترقیاتی کاموں میں رکاوٹ ڈالنے کے لئے احتجاج کررہے ہیں ، ان کا چھ فروری کو احتجاج ترقی کے خلاف ہے ، وہ صرف کنٹینر پر چڑھ سکتے ہیں انہیں دمادم مست قلندر کا کیا پتہ ہے ۔ انہوں نے کہا کہ اپوزیشن لیڈر خورشید شاہ کا گزشتہ روز کا لب و لہجہ انتہائی شرم ناک اور توہین آمیز تھا انہیں اپنے سید ہونے کی لاج ہی رکھنی چاہیے تھی ۔ صوبائی وزیر قانون کا کہنا تھا کراچی واقعہ میں کچھ لوگوں کو حراست میں لے کر تفتیش کی جا رہی ہے ، جلد سازشی عناصر بے نقاب ہوں گے ۔ پیپلز پارٹی کے حوالے سے ان کا کہنا تھا کہ پیپلز پارٹی فرینڈلی اپوزیشن کے طعنے سے تنگ آکر سب کچھ کر رہی ہے ۔وزیراعظم نوازشریف اور آرمی چیف جنرل راحیل شریف ترقی کے سفر میں ایک پیج پر ہیں۔
3