لاہور (نیوزڈیسک) چیئرمین پنجاب آئی ٹی بورڈ ڈاکٹر عمر سیف نے کہا ہے کہ پنجاب کے دس لاکھ سے زائد کاشتکاروں کو پنجاب کسان ریلیف پیکج کے تحت محض دو ماہ کے عرصے میں 22ارب روپے سے زائد کی امدادی رقوم تقسیم کی جا چکی ہیں جو کہ ملکی تاریخ میں ایک ریکارڈ ہے۔ وہ گذشتہ روز ارفع سافٹ ویئر ٹیکنالوجی پارک میں منعقدہ ایک اجلاس سے خطاب کر رہے تھے۔انہوں نے کہا کہ وزیر اعلیٰ پنجاب محمد شہباز شریف نے پنجاب کے کسانوں میں 341ارب روپے کی خطیر رقم تقسیم کرنے کا اعلان کیا تھا جو کہ اگر مروجہ کاغذی کارروائی کے ذریعے تقسیم کیا جائے تو کئی سال کا عرصہ درکارہو گالیکن پی آئی ٹی بی کے کمپیوٹرائزڈ نظام نے اسے نہ صرف آسان اور تیزترین بنا دیا ہے بلکہ شفافیت کے ذریعے ممکنہ تاخیر اور بدعنوانی کا سدِ باب بھی کر دیا ہے جس سے امدادی رقوم اصل مستحقین تک پہنچانے میں مدد ملے گی۔ڈاکٹر عمر سیف نے بتایا کہ اس کمپیوٹرائزڈ نظام کے تحت موقع پر ہی مستحقین کی نادرا ریکارڈ سے شناخت کی جاتی ہے اور پھر مختصر وقت میںم تعقلہ بینک کے کائونٹرز سے ادائیگی کر دی جاتی ہے۔