اسلام آباد(نیوز ڈیسک)علامہ اقبال اوپن یونیورسٹی کا قیام ملک سے ناخواندگی کے خاتمے اور کم آمدنی والے طبقات تک تعلیم و تربیت کی اعلیٰ سطحی سہولتیں ان کی رہائش گاہوں کے قریب فراہم کرنے کے لئے عمل میں لایا گیا تھا۔ یونیورسٹی کم وسائل رکھنے والے شہریوں کے بچوں کو داخلہ فیس کی ادائیگی میں سہولتیں فراہم کرتی ہے۔ اس سلسلے میں یونیورسٹی نے فیس انسٹالمنٹ اسکیم متعارف کردی ہے ٗ اس اسکیم سے وہ طلبہ و طالبات جو یکمشت کسی سمسٹر کی فیس ادا نہیں کرسکتے ٗ ان کی سہولت کے لیے آسان اقساط میں فیس وصولی کی اسکیم جاری کی گئی ہے”ان خیالات کا اظہار یونیورسٹی کے وائس چانسلر نے سمسٹر بہار 2016ء کے داخلوں کے سلسلے میں منعقدہ اجلاس سے خطاب میں کیا۔ انہوں نے کہا کہ یونیورسٹی کے مالی معاونت اسکیم کے تحت یونیورسٹی کم آمدنی والے طلبہ و طالبات اور مستحق طلبہ کو ان کے پروگرام کی ٹیوشن فیس میں تین سمسٹر تک یا پورے تعلیمی پروگرام میں پچاس فیصد تک رعایت بھی فراہم کرتی ہے۔ڈاکٹر شاہد صدیقی نے کہا کہ قدرتی آفات)زلزلہ ٗ سیلاب وغیرہ(سے متاثرہ علاقوں میں یونیورسٹی کے طلبہ و طالبات کی مالی معاونت کے لئے سکالرشپ فار کمیونٹیز کے نام سے بھی ایک سکیم متعارف کی گئی ہے ٗ جس کے تحت متاثرہ علاقوں کے طلبہ کو ادا شدہ ٹیوشن فیس کا پچاس فیصد سے لے کر صد فیصد تک سکالر شپ فراہم کیا جاتا ہے۔ وائس چانسلر نے شعبہ داخلہ کے ڈائریکٹر کو ہدایت کی ہے کہ یکم فروری سے شروع ہونے والے سمسٹر بہار 2016ء کے داخلوں کے لئے طلبہ کو ہر سطح کی سہولتیں ان کی رہائش گاہوں کے نزدیک ترین مقامات پر مہیا کریں۔ ڈائریکٹر شعبہ داخلہ ٗ سید ضیاء الحسنین نے ان اسکیموں سے مستفید ہونے کے لئے ملک بھر میں موجود مستحق طلبہ کو ہدایت کی ہے کہ وہ یونیورسٹی کے نزدیک ترین علاقائی دفاتر سے رابطہ کریں۔ انہوں نے نے وائس چانسلر کو یقین دہانی کرائی کہ سمسٹر بہار 2016ء کے میٹرک سے پی ایچ ڈی سطح تک کے مختلف پروگرامز کے داخلے جو یکم فروری سے ملک بھر میں ایک ساتھ شروع ہورہے ہیں ٗ کے داخلہ فارم اورپراسپکٹس کی فراہمی کے لئے یونیورسٹی کے مین کیمپس ٗ ملک بھر میں موجود تمام علاقائی دفاتر/رابطہ دفاتر میں سیل پوائنٹس قائم کئے جائیں گے اور علاقائی دفاتر میں داخلوں کے بارے میں طلبہ و طالبات کی رہنمائی کے لئے خصوصی ونڈوز بھی قائم کی جائیں گی۔