لاہور(نیوز ڈیسک)پاکستان تحریک انصاف کی مرکزی ،صوبائی اور ضلعی سطح کی تمام تنظیمیں تحلیل کردی گئیں ،چھ ہفتوں تک جاری رہنے والی رکنیت سازی مہم کے باضابطہ آغاز کابھی اعلان کر دیا گیا ،انتخاب میں حصہ لینے والوں کےلئے ابتدائی طور پر ضابطہ اخلاق بھی جاری کیا گیا ہے ۔ چیف الیکشن کمشنر تسنیم نورانی کی طرف سے جاری نوٹیفکیشن کے مطابق تمام مرکزی ،صوبائی اور ضلعی سطح کی تنظیمیں تحلیل کر دی گئی ہیں،نیشنل ایڈ وائزری کونسل اور انصاف سٹوڈنٹس فیڈریشن سمیت پارٹی کے تمام ونگزبھی تحلیل کر دئیے گئے ہیں تاہم چیئرمین تحریک انصاف، سیکرٹری مالیات اور مرکزی سیکرٹری اطلاعات کے عہدے اس سے مستثنیٰ ہوں گے ۔ انٹرا پارٹی انتخابات کی تکمیل تک پارٹی کے معاملات چیف الیکشن کمشنر ، الیکشن کمیشن اور اس کے مقرر کر دہ الیکشن کوارڈ ی نیٹرز کے سپرد ہوں گے۔ انٹر اپارٹی انتخابات کے دوران جلسے ، جلوس اور دیگر سر گرمیاں کم سے کم رکھنے کی ہدایت دی گئی ہے ۔ ناگزیر سیاسی سر گرمیوں کے لئے چیئرمین تحریک انصاف کو جماعتی انتخابات میں حصہ نہ لینے والے اراکین پارلیمان کی خدمات حاصل کرنے کی اجازت ہوگی ۔ پارٹی انتخابات لڑنے کے خواہشمند رہنماﺅں پر پارٹی دفاتر اور دیگر پارٹی سہولیات کے استعمال پر مکمل پابندی ہو گی ۔ چھ ہفتوں تک جاری رہنے والی رکنیت سازی مہم کے باضابطہ آغاز کابھی اعلان کر دیا گیا ۔ رکنیت سازی مہم کا اطمینان بخش حصہ ہوتے ہی انتخابی شیڈول جاری کر دیا جائے گا ۔ جعلی ووٹوں کے اندراج کی کوشش کرنے والوں کے خلاف سخت کارروائی کا بھی اعلان کیا گیا ہے ۔