لاہور(نیوزڈیسک)وقار یونس کی کوچنگ کا مستقبل،کرکٹ بورڈ نے فیصلے کا اعلان کردیا،وقار یونس کی کوچنگ میں پاکستانی ٹیم کی ون ڈے میں کارکردگی اچھی نہیں رہی ہے اور وہ نو میں سے چھ ون ڈے سیریز ہار چکی ہے،پاکستان کرکٹ بورڈ نے قومی کرکٹ ٹیم کے ہیڈ کوچ وقار یونس پر اعتماد برقرار رکھتے ہوئے انھیں اس سال انگلینڈ کے دورے میں بھی کوچ برقرار رکھنےکا فیصلہ کیا ہے۔واضح رہے کہ وقار یونس کا کوچ کی حیثیت سے دو سالہ معاہدہ انگلینڈ کے دورے سے پہلے رواں برس مئی میں ختم ہو رہا ہے۔پاکستان کرکٹ بورڈ کے چیئرمین شہر یارخان نے برطانوی نشریاتی ادارے بی بی سی سے بات کرتے ہوئے کہا کہ وقار یونس اور دیگر کوچنگ سٹاف کے معاہدوں کی تجدید کے بارے میں ابھی حتمی فیصلہ نہیں کیاگیا ہے لیکن یہ طے ہے کہ وقار یونس سمیت پورا کوچنگ سٹاف انگلینڈ کے دورے میں اپنی ذمہ داریاں جاری رکھے گا۔شہر یار خان نے کہا کہ ٹیم کے فزیو بریڈ رابنسن اس ماہ نیوزی لینڈ کے دورے کے بعد پاکستانی ٹیم سے وابستہ نہیں رہیں گے۔ ان کی جگہ دیکھا جائے گا کہ کس غیر ملکی کی تقرری کی جائے یا پاکستانی فزیو کو ذمہ داری سونپی جائے۔وقار یونس گذشتہ سال جون میں دوسری مرتبہ پاکستانی ٹیم کے کوچ بنے تھے۔ ان کی کوچنگ میں پاکستانی ٹیم نے آسٹریلیا، بنگلہ دیش، سری لنکا اور انگلینڈ کے خلاف ٹیسٹ سیریز جیتی ہیں، نیوزی لینڈ کے خلاف ٹیسٹ سیریز برابر رہی جبکہ سری لنکا کے خلاف ایک ٹیسٹ سیریز ہاری ہے۔وقار یونس کی کوچنگ میں پاکستانی ٹیم کی ون ڈے میں کارکردگی اچھی نہیں رہی ہے اور وہ نو میں سے چھ ون ڈے سیریز ہار چکی ہے۔گذشتہ ورلڈ کپ میں پاکستانی ٹیم کو کوارٹرفائنل میں شکست کا سامنا کرنا پڑا تھا۔