اسلام آباد (نیوز ڈیسک)گوجرانوالہ میں پولیس نے ایک نوجوان اور اس کے ساتھیوں کے خلاف آسٹریلوی نژاد خواجہ سرا کے ساتھ مبینہ فراڈ، جعلی نکاح نامہ تیار کرنے، کروڑوں روپے ہتھیانے اور حبسِ بے جا میں رکھنے کے الزام میں مقدمہ درج کرلیا ہے۔

پولیس کے مطابق عثمان نامی نوجوان کی آسٹریلوی خواجہ سرا سے سوشل میڈیا پلیٹ فارم ٹک ٹاک کے ذریعے شناسائی ہوئی تھی۔ متاثرہ شہری مبینہ طور پر دو مرتبہ پاکستان آیا، جہاں ملزم نے اس کے ساتھ نکاح کا جعلی دستاویزی ثبوت تیار کروایا۔درخواست میں الزام عائد کیا گیا ہے کہ عثمان اور اس کے ساتھیوں نے مبینہ طور پر آسٹریلوی شہری سے 4 کروڑ روپے سے زائد رقم اپنے اکاؤنٹس میں منتقل کروائی۔ بعد ازاں جب متاثرہ شخص نے پاکستان سے واپس جانے کی کوشش کی تو اسے مبینہ طور پر زبردستی روک لیا گیا۔مقدمے کے مطابق ملزمان نے آسٹریلوی شہری کو بیرون ملک روانہ کرنے کے بدلے مزید رقم کے ساتھ ساتھ اپنے لیے ویزوں کا مطالبہ بھی کیا۔متاثرہ خواجہ سرا مبینہ حراست سے یکم جون کو فرار ہونے میں کامیاب ہوا اور لاہور پہنچ گیا،

جہاں سے اس نے متعلقہ حکام سے رابطہ کیا۔واقعے کی درخواست موصول ہونے کے بعد لدھیوالہ وڑائچ پولیس نے مقدمہ درج کرکے کارروائی شروع کردی۔ پولیس نے مرکزی ملزم عثمان اور اس کے والد کو حراست میں لے لیا ہے، جبکہ معاملے کے دیگر پہلوؤں اور مبینہ ساتھیوں کے کردار کی تحقیقات جاری ہیں۔پولیس کا کہنا ہے کہ تحقیقات مکمل ہونے کے بعد واقعے سے متعلق مزید حقائق سامنے آئیں گے۔