لاہور (این این آئی)سابق اداکارہ نور بخاری نے سابق شوہر عون چوہدری سے دوبارہ شادی اور زندگی میں پیش آنے والے نشیب و فراز کے حوالے سے کھل کر گفتگو کی ہے۔ن

ور بخاری نے ایک انٹرویو میں بتایا کہ عون چوہدری سے دوبارہ شادی کا میں نے کبھی منصوبہ نہیں بنایا تھا، یہ سب اللہ تعالی کی طرف سے لکھی گئی تقدیر کا حصہ تھا، ہم دونوں کے درمیان محبت تھی اور ہم دوبارہ ایک دوسرے کے قریب آ گئے۔اداکارہ نے بتایا کہ میری ایک بیٹی بھی عون چوہدری سے ہے، جس نے دونوں کو دوبارہ قریب آنے میں اہم کردار ادا کیا، جب میں نے شوبز چھوڑنے کا فیصلہ کیا تو اللہ تعالی نے عون چوہدری کے دل میں بھی یہ خیال ڈالا اور آج ہم 4بچوں کے ساتھ خوش گوار زندگی گزار رہے ہیں۔نور بخاری نے اپنی زندگی کے تجربات کا ذکر کرتے ہوئے کہا کہ میں 4طلاقوں سمیت زندگی میں کئی نشیب و فراز دیکھ چکی ہوں، میں نے ان تجربات سے یہ سیکھا کہ اللہ تعالی ہی وہ ذات ہے جو انسان کے ساتھ ہمیشہ رہتی ہے اور کبھی اسے تنہا نہیں چھوڑتی۔

انہوں نے کہا کہ میں ماضی میں نہیں دیکھتی بلکہ ہمیشہ اپنی زندگی میں آگے بڑھنے پر توجہ دیتی ہوں۔بیٹیوں کی ماں کی دوسری شادی سے متعلق بات کرتے ہوئے نور بخاری نے کہا کہ اسلام دوسری شادی کی اجازت دیتا ہے تاہم اگر کسی خاتون کی بیٹی ہو تو اسے دوسرے خاندان میں شادی کرنے سے گریز کرنا چاہیے کیونکہ دوسرا شخص بچی کا حقیقی والد نہیں بن سکتا، ایسی صورت میں سابق شوہر سے صلح یا دوبارہ ازدواجی تعلق قائم کرنا بہتر ہو سکتا ہے۔نور بخاری کے ان بیانات پر سوشل میڈیا صارفین کی جانب سے مختلف ردِعمل سامنے آیا ہے۔ایک صارف نے نور بخاری کے فیصلے کو سراہتے ہوئے کہا کہ وہ اب اسلامی اصولوں کے مطابق زندگی گزار رہی ہیں۔