اسلام آباد (نیوز ڈیسک) کراچی کی ایڈیشنل ڈسٹرکٹ اینڈ سیشن عدالت جنوبی نے گزری تھانے میں درج منشیات کے مقدمے میں نامزد انمول عرف پنکی کی بریت کی درخواست منظور کرتے ہوئے انہیں کیس سے بری کرنے کا حکم دے دیا۔
عدالت میں ملزمہ کی جانب سے ایڈووکیٹ انعم کوثر نے دلائل پیش کیے۔ وکیل صفائی نے مؤقف اختیار کیا کہ انمول عرف پنکی کے خلاف 2021 میں تھانہ گزری میں منشیات کا مقدمہ درج کیا گیا تھا اور وہ اس کیس میں مفرور قرار دی گئی تھیں۔وکیل کے مطابق ملزمہ کو مقدمے میں صرف شریک ملزمان کے بیانات کی بنیاد پر نامزد کیا گیا، جبکہ کیس میں شامل دیگر دو ملزمان علی اور فہمیدہ کو 2024 میں عدالت پہلے ہی بری کرچکی ہے۔
دفاعی وکیل نے مؤقف اپنایا کہ جب مقدمے کے دیگر شریک ملزمان بری ہوچکے ہیں تو انمول عرف پنکی کے خلاف بھی سزا کی بنیاد باقی نہیں رہتی۔عدالت نے دلائل اور مقدمے کے ریکارڈ کا جائزہ لینے کے بعد ملزمہ کی بریت کی درخواست منظور کرلی اور انہیں منشیات کے مقدمے سے با ضابطہ طور پر بری کرنے کا حکم جاری کردیا۔
