اسلام آباد(نوز ڈیسک) امریکا اور ایران نے دونوں ممالک کے درمیان جاری 60 روزہ جنگ بندی کی مدت بڑھانے کے بنیادی اصول پر اتفاق کرلیا ہے۔
موجودہ جنگ بندی کی مقررہ مدت 17 اگست کو ختم ہونے والی ہے۔ترک میڈیا رپورٹس کے مطابق واشنگٹن اور تہران نے جنگ بندی میں توسیع کے حوالے سے ثالثی کرنے والے فریقین کو اپنی رضامندی سے آگاہ کردیا ہے۔رپورٹس میں بتایا گیا ہے کہ جنگ بندی میں توسیع کے لیے ہونے والی پیش رفت ’’اسلام آباد ایم او یو‘‘ کے فریم ورک کے تحت ہوئی۔ دونوں ممالک نے جنگ بندی کو برقرار رکھنے پر اتفاق تو کرلیا ہے، تاہم اس میں کتنے دن یا ہفتے کا اضافہ کیا جائے گا، اس بارے میں ابھی حتمی فیصلہ نہیں کیا گیا۔ذرائع کے مطابق فریقین کے درمیان توسیع کے اصول پر اتفاق کے بعد آئندہ مرحلے میں نئی مدت اور دیگر تفصیلات طے کیے جانے کا امکان ہے۔واضح رہے کہ 8 سے 24 جولائی کے دوران امریکا اور ایران کے درمیان فوجی کارروائیوں کا سلسلہ جاری رہا تھا۔
امریکی فورسز نے ایران کے مختلف اہداف کو نشانہ بنانے کا دعویٰ کیا، جبکہ ایران کی جانب سے جواباً اردن، بحرین اور کویت سمیت بعض عرب ممالک میں موجود امریکی فوجی تنصیبات اور سازوسامان کو نشانہ بنانے کا دعویٰ سامنے آیا تھا۔موجودہ جنگ بندی میں توسیع کو خطے میں کشیدگی کم رکھنے اور فریقین کے درمیان مزید مذاکرات کے لیے اہم پیش رفت قرار دیا جا رہا ہے۔
